A rede internacional Impact Hub aterra na Coruña

mércores, 13 de decembro do 2023 S. P.

Impact Hub presentou na tarde deste mércores 13 de decembro o seu proxecto na súa sede, un lugar na rampla do Matadoiro (A Coruña) intervido para a co-creación e o fornecemento de proxectos innovadores, sustentábeis, socialmente responsábeis e de impacto positivo.
O evento reuniu a diferentes grupos de interese entre os que se inclúen administracións públicas, fundacións, cooperativas, asociacións, startups, emprendedores sociais, corporacións e sociedade en xeral co fin de xerar unha comunidade que sirva como “caldo de cultivo dos proxectos cun fin social e ambiental que pretenden transformar ás empresas cara a unha nova economía”, explicaron os responsábeis do novo centro.
O evento incluíu unha mesa redonda sobre os retos de impacto positivo que tanto Galicia como A Coruña afrontan. A mesa, liderada pola nena de 12 anos Carmen González, contou coa participación de Margarita Ardao Rodríguez, directora xeral de Emprendemento da Xunta de Galicia, Yoya Neira Fernández, concelleira de Benestar Social, Manuel Rego, director executivo de Down Coruña e socio director de WiT Talento, e Óscar Vales, Fundador de VAZVA, Wasted Shoes.
Con esta iniciativa local, A Coruña confírmase como a sexta cidade do ámbito estatal que logra instaurar un proxecto Impact Hub no seu seo. A rede está composta por 110 hubs con presenza en 65 países.
Segundo explicou o equipo fundador do proxecto coruñés, Impact Hub chega á cidade herculina coa “misión de axudar a persoas emprendedoras, institucións e empresas a acelerar o cambio económico, social e ambiental cara unha economía de impacto e rexenerativa”. O equipo tamén salienta o potencial da nosa terra para este tipo de iniciativas: “Galicia conta cun forte potencial de impacto positivo polas súas grandes empresas tractoras, o seu sólido ecosistema de emprendemento, os seus recursos naturais e a súa su consolidación como polo tecnolóxico a nivel estatal”.
O proxecto está impulsado por cinco persoas vinculadas ao impacto desde diferentes ámbitos: Carmen Touza (directora da Fundación ENKI, especializada en impacto social e inclusión), María JesúsTrasancos (vicepresidenta de Fundación ENKI), Javier López (empresario coruñés, investidor e impulsor de diversas fundacións vencelladas ao emprendemento e inserción social), Carlos Álvarez (emprendedor especializado en publicidade, comunicación e aceleración de transformación de marcas), e Judit Cabana (emprendedora especializada en estratexia de negocio e mercadotecnia).
Impact Hub A Coruña contará nos próximos meses tamén cunha sede física destinada a integrar proxectos de impacto e conectalos coa cidade.

PUBLICIDADE