A relación entre creación e tecnoloxía centrará o EAN 2026

A Xunta de Galicia vén de abrir unha nova convocatoria do Encontro de Artes Novas Cidade da Cultura de Galicia (EAN), que ofrece a 28 artistas, investigadores e profesionais emerxentes do sector cultural a posibilidade de convivir durante catro días no Gaiás para presentar o seu traballo, compartir prácticas, metodoloxías e inquedanzas. Nesta edición préstase especial atención á intersección entre arte e tecnoloxía e actívase por primeira vez a Residencia Artística EAN, orientada a apoiar proxectos de creación ou investigación neste ámbito.
Baixo a dirección da comisaria, xestora cultural e crítica de arte Chus Martínez, o encontro desenvolverase no Gaiás entre o 1 e o 4 de setembro deste ano. O programa inclúe presentacións de proxectos, conversas con artistas, mentores e profesionais, así como unha sesión de traballo colectivo, nun formato que aposta pola aprendizaxe compartida entre creadores emerxentes e figuras consolidadas. O prazo para presentar candidaturas permanecerá aberto ata o 21 de maio de 2026.
Ademais, quen obteña praza no Encontro de Artes Novas 2026 poderá optar á Residencia Artística EAN e acceder a unha estancia de traballo de tres meses no Museo Gaiás, que contará cunha dotación de 12.000 euros, acompañamento curatorial, apoio á produción e acceso a recursos, ademais de favorecer o intercambio con profesionais do futuro Centro Galego de Artes Dixitais.
Deste xeito, o EAN intégrase no programa de residencias REGA, impulsado pola Consellería de Cultura, Lingua e Xuventude para fomentar a creación artística aproveitando as infraestruturas e equipamentos punteiros da Cidade da Cultura, así como a colaboración con organizacións e colectivos de referencia na creación contemporánea.

Un espazo para dialogar e compartir procesos

Esta edición do Encontro de Artes Novas contará coa participación de figuras recoñecidas como a escritora, comisaria e podcaster Sonia Fernández Pan, que desde 2021 desenvolve a serie de podcasts The Tale and The Tongue co Instituto de Arte, Xénero e Natureza da Escola Superior de Deseño e Arte de Basilea. Tamén estará presente a dupla artística Clo-Plas, integrada pola poeta e xornalista Xiana Arias e o artista e investigador Berio Molina, cunha proposta sonora que combina versos e electro-pop minimalista coa oralidade popular da Fonsagrada.
O programa inclúe igualmente unha conversa co profesor e investigador en Filosofía da Tecnoloxía Pablo Sanguinetti, autor do libro Tecnohumanismo. Por un diseño narrativo y estético de la inteligencia artificial, ademais de numerosos artigos sobre a relación entre tecnoloxía, humanidades e creatividade.
Como novidade, os artistas seleccionados participarán nunha sesión para coñecer o funcionamento de Medialab Matadero, un dos espazos culturais máis dinámicos e innovadores de España no ámbito da creación contemporánea, así como nunha sesión de traballo colectivo conducida pola artista de novos medios Laura Tabarés e o arquitecto, artista visual e docente Jacobo Bugarín, ambos antigos participantes do encontro.

Candidaturas ata o 21 de maio

A convocatoria do Encontro de Artes Novas Cidade da Cultura está dirixida a persoas e colectivos cunha práctica artística contemporánea, independentemente da súa formación, sempre que a documentación presentada permita avaliar a existencia dunha obra, liña de investigación ou proxecto creativo en desenvolvemento, consolidación ou reformulación.