A saga Call of Duty podería descansar en 2023

mércores, 23 de febreiro do 2022 Marcus Fernández

Aínda que a franquía de Call of Duty é unha das máis fortes do sector dos videoxogos, con Call of Duty: Vanguard demostrou certa fatiga, e dende Activision Blizzard estarían a ser moi conscientes da situación, de xeito que, ao igual que aconteceu hai anos coa serie Assassin’s Creed, dende Bloomberg aseguran que non haberá entrega anual de Call of Duty en 2023.
Ao parecer, dende a compañía consideran que están a lanzar demasiado rápido cada entrega de Call of Duty, e precisan máis tempo para estar á altura das expectativas dos seareiros, e para suplir o baleiro da entrega de 2023 de Call of Duty estarían xa a traballar noutros proxectos.
Cómpre lembrar que para o ano que vén xa está previsto o lanzamento dun novo Call of Duty en liña baixo o modelo free-to-play, que podería ser aínda máis forte do esperado, xa que parte dos recursos destinados ás entregas anuais da saga centraríanse agora na entrega de balde, que con Warframe ten demostrado que atende a unha forte demanda do público (e xera fortes ingresos).
Queda por confirmar se realmente quedaremos sen entrega anual de Call of Duty en 2023, e incluso se a saga podería pasar a ter entregas tradicionais cada dous anos, alternando así os xogos tradicionais cos free-to-play, aínda que estas decisións son difíciles de prever, xa que non podemos esquecer que Activision Blizzard inmersa nun proceso de compra por parte de Microsoft.

PUBLICIDADE