A serie galega Rapa volve a MovistarPlus+

O Teatro Jofre de Ferrol acolleu na tarde de onte a estrea da segunda temporada de Rapa, serie de Portocabo para MovistarPlus+ que regresa á emisión na plataforma de vídeo en streaming trala rodaxe en outono na cidade departamental co apoio da Xunta.
Os seis capítulos que conforman a nova entrega desta ficción, ideada polos galegos Pepe Coira e Fran Araújo con produción a cargo da produtora coruñesa Portocabo, contaron para a súa gravación cunha contribución económica da Consellería de Cultura, Educación, FP e Universidades de 300.000 euros procedentes do fondo de atracción de rodaxes do Hub Audiovisual galego.
No pase participaron o director da Axencia Galega das Industrias Culturais, Jacobo Sutil, a delegada territorial da Xunta en Ferrol, Martina Aneiros, os actores Javier Cámara e Mónica López, e os directores-guionistas Pepe e Jorge Coira e Fran Araújo. Tamén acudiu boa parte do equipo actoral galego, formado por (entre outras/os) Evaristo Calvo, Melania Cruz, Iolanda Muíños, Carlos Blanco, Darío Loureiro, Chisco Amado, Adrián Ríos, Lara Boedo ou Federico Pérez.
Na súa intervención, Jacobo Sutil explicou que a nova entrega desta serie é “un reflexo máis do gran momento que vive nos últimos anos o audiovisual galego”. Felicitou tamén a todo o equipo da produción polo resultado artístico e de difusión acadado xa na primeira temporada de Rapa, e por “ser quen de poñer en valor unha vez máis a profesionalidade dos nosos actores e actrices e da nosa escrita audiovisual”.
Con anterioridade á première, a delegada territorial da Xunta Martina Aneiros participou xunto ao elenco da serie na inauguración oficial da Menina de Rapa que, con obxecto da promoción desta produción audiovisual, pintouse na rúa Gabriel Vázquez Seijas. O autor do mural e alma máter do festival urbano Meninas de Canido, Eduardo Hermida, foi o encargado de explicar aos asistentes a composición da peza protagonizada pola menina Agustina Sarmiento, que sostén na súa man unha das fragatas que se constrúen en Ferrol, coas grúas dos estaleiros de fondo.
A segunda temporada de Rapa desenvólvese no Arsenal Militar de Ferrol. Este ambiente ríxido, tan marcado polas normas estritas de funcionamento, volverá poñer en contacto os dous protagonistas da primeira temporada: Tomás, encarnado polo actor Javier Cámara, e Maite, a quen lle dá a vida Mónica López. Os dous afanaranse por resolver cadanseu caso pendente: a desaparición dun oficial e un asasinato sen resolver que se arrastra dende 20 anos atrás.
Rapa converteuse coa súa primeira entrega na mellor estrea de ficción da pasada tempada en Movistar Plus+. O proxecto conta co apoio do Hub Audiovisual da Xunta financiado polo Fondo Europeo de Desenvolvemento Rexional (FEDER) dentro do Eixo REACT-UE.
Alén disto, lembrar que Portocabo achegará un novo proxecto a Movistar Plus+ co-producido pola empresa galega. Trátase da miniserie Garbo, creada polo mesmo equipo creativo de Rapa e Hierro: Pepe Coira, Fran Araújo e Jorge Coira. Contará a historia real de Juan Pujol, un axente dobre español que foi clave para que os aliados gañasen a II Guerra Mundial.
Este thriller policíaco creado por Pepe Coira e Fran Araújo, cuxo rodaxe finalizou en decembro, conta nesta segunda tempada con Rafa Montesinos e Marta Pahissa na dirección.
A segunda tempada de seis episodios chegou á plataforma hoxe.