A tecnoloxía galega Hosix impulsa a sinatura dixital médica en Perú
luns, 29 de agosto do 2016
A empresa
galega SIVSA vén de facer reconto da traxectoria trazada pola súa
ferramenta Hosix (sistema para a xestión e a información
hospitalaria) en Perú, máis polo miúdo nos dos grandes
complexos médicos do país andino onde o devandito produto está
implantando, abranguendo todos os ámbitos de actividade relacionados
coa súa xestión: o Hospital Alberto Leopoldo Barton Thompsony Villa
María e o Hospital Guillermo Kaelin de la Fuente. Nestes dous
centros SIVSA deu forma a un módulo específico de sinatura ao
abeiro de Hosix.
“Grazas ao noso avanzado módulo de sinaturas”, sinalan fontes de
SIVSA, “os dous hospitais están a optimizar a organización e a
eficacia do traballo cotián”.
De feito, nun plano máis concreto, logo da campaña
desenvolvida pola Xerencia da Sociedade Operadora coa ferramenta de
SIVSA, incrementouse “de maneira significativa” a porcentaxe de
documentos rubricados a través de sinatura dixital, chegando a
obterse unha porcentaxe do 99% sobre o total. “Grazas a isto”,
engade a compañía galega, “ambos hospitais foron quen de
converterse nos primeiros centros de saúde públicos que dispoñen
de historia clínica dixital única no país, o que lles permite
cumprir coa lexislación vixente, protexerse contra a falsificación
e a suplantación de identidades e protexer a integridade do contido
asinado”.
Entre as principais características da tecnoloxía
galega atópase a súa capacidade de axilizar e organizar os procesos
na atención, incrementando a súa eficiencia.