A tenda dixital de Xbox 360 pechará dun xeito exemplar

En novembro a Xbox 360 cumprirá 18 anos, e esta consola que conseguiu coller a dianteira á PlayStation 3 (algo que Microsoft non repetiría en seguintes xeracións) prepárase para dicir adeus á súa tenda dixital, que sorprende que aínda estivese activa.
A data elixida para pechar esta etapa é o 29 de xullo de 2024, cando deixará de ser posible mercar xogos e contido descargable a través da tenda dixital de Xbox 360, cambio que tamén suporá o cesamento do funcionamento da aplicación Películas y programas de TV.
Normalmente este tipo de peche resulta traumático, pero desta volta a cousa é moi diferente, xa que boa parte do catálogo de Xbox 360 é retrocompatible coas consolas posteriores, polo que moitos dos xogos desta veterana consola continuarán a estar dispoñibles para a súa compra dende consolas Xbox One e Xbox One X|S, mentres que as películas e series adquiridas en Xbox 360 seguirán a estar dispoñibles en consolas posteriores e tamén en ordenadores con Windows 10 ou superior. Temos así un magnífico exemplo do positiva que pode ser a retrocompatibilidade a longo prazo.
Durante os vindeiros meses os usuarios de Xbox 360 que aínda empreguen a súa consola poderán seguir a realizar compras dixitais (o que pode ser unha oportunidade para completar compras que tiñan adiadas) e unha vez pechada a tenda en liña poderán seguir a xogar a todos os xogos e incluso será posible borralos da consola e volver descargalos cando se desexe, ou sexa, que na práctica o que acontece é que non se poden realizar novas compras, pero a consola non quedará abandonada (nalgúns casos incluso manteranse os modos multixogador en liña), algo que non é nada frecuente no sector.