A transformación dixital e os mellores xeitos de encarala, ao detalle nunha xornada da AEF en Narón
venres, 13 de decembro do 2019
A
Asociación de
Empresarios Ferrolterra vai organizar a semana vindeira un novo
encontro profesional para dar a coñecer as moitas vantaxes de
adaptar os nosos negocios ás contornas e ferramentas tecnolóxicas.
Estamos a falar da Xornada
sobre Transformación Dixital (Unha transformación de negocio e da
organización), que se celebra o mércores 18 de decembro ás
19.00 horas no Hotel Sercotel Odeón de Narón. A xornada conta con
financiamento da Deputación da Coruña.
No
transcurso da sesión amosaranse varios exemplos de transformación e
das principais consecuencias de adoptar un plan empresarial para
levala a cabo. Asemade, porase o foco en como están a afectar as
tecnoloxías ás empresas da nosa contorna, avaliando a natureza dos
cambios e vendo até que punto muda o xeito de organizar aquelas e
xestionalas.
A
xornada será presentada polo presidente da AEF, José Ramón Franco.
A primeira parte da sesión estará enfocada a falar da tecnoloxía
en si mesma. Miguel Vidal (CTO da startup ferrolá Ártabro
Tech) abordará os cambios que se están a producir e os que están
por vir, así como a maneira en que estes avances van afectar ás
firmas non tecnolóxicas. Na segunda parte, Eugenia Juncal (directora
de Área do Grupo Atlante) avaliará os xeitos de afrontar esta
transformación desde o punto de vista das persoas e das estruturas
organizativas. Segundo informa a organización do evento, os dous
relatores sitúanse entre os máximos referentes da aplicación das
novas tecnoloxías no ámbito empresarial galego. Ao finalizar o
evento, desenvolverase a Copa de Nadal da AEF.