A triloxía de Double Dragon estréase en dispositivos móbiles

xoves, 5 de decembro do 2013 Marcus Fernández

Para os seareiros dos xogos de loita de máquinas recreativas de finais dos anos 80, concretamente do xénero dos beat’em up, DotEmu vén de recuperar unha xoia que dende hoxe podemos adquirir por 2,69 euros na App Store e en Google Play: Double Dragon Trilogy. Esta aplicación inclúe os tres xogos da saga arcade: Double Dragon, Double Dragon 2: The Revenge e Double Dragon 3: The Rosetta Stone.
Nestes xogos haberá que abrirse paso por distintos escenarios a base de puñazos, patadas e golpes propinados cos cóbados, os xeonllos ou a testa, ou empregando algunha das armas dos inimigos que atoparemos no camiño. Pode controlarse coa pantalla táctil do noso smartphone ou tablet, aínda que tamén é compatible cos mandos de xogo para os nosos dispositivos (tanto en iOS como en Android), presenta dous modos de xogo (Arcade e Historia), ten tres niveis de dificultade (móbil, orixinal e experto) e permite elixir entre a banda sonora orixinal dos xogos ou unha versión remasterizada. Toda unha delicia para os amantes do retro.

A terceira entrega da saga amosa uns gráficos máis estilizados
Double Dragon Trilogy aproveita a nostalxia dos xogadores de máquinas recreativas para recuperar esta memorable franquía




Trailer de Double Dragon Trilogy

PUBLICIDADE