A web da Tropa Verde achega xogos e obradoiros sobre reciclaxe e coidado do medio
mércores, 1 de abril do 2020
A
web
da iniciativa ambiental Tropa Verde converteuse estes días nun
fervedoiro de actividades para achegar un algo de entretemento e
divulgación ás nenas e nenos durante estes días de confinamento.
Trátase dunha manchea de xogos e obradoiros relacionados coa
temática da iniciativa Tropa Verde, que, como lembraremos, diríxese
a fomentar a nivel local a reciclaxe e o coidado polo medio natural a
través dunha serie de premios á cidadanía máis comprometida e
activista.
Segundo
informa o Concello de Santiago (que impulsa Tropa Verde a través das
concellerías de Medio Ambiente e de Centros Socioculturais), a
listaxe de propostas é ben ampla: hai dende xogos para aprender a
separar residuos ou facer compostaxe ata obradoiros para construír
unha depuradora, un forno solar, unha depuradora ou fabricar papel
reciclado.
O
obxectivo, segundo sinalou a concelleira de Medio Ambiente, Mila
Castro, é que “o tempo de confinamento se converta en tempo de
ocio, no que todos os membros da familia se divirtan e se formen
xogando”. Neste caso, dixo, “pequenos e maiores aprenden a
concienciarse da importancia de preservar o medio ambiente a través
da regra das tres erres: reciclar, reutilizar e reducir”.
Tropa
Verde
O
proxecto Tropa Verde, unha plataforma web creada pola empresa Teimas
Desenvolvemento, ten por obxectivo fomentar a reciclaxe e a
responsabilidade ambiental entre a cidadanía, premiando de xeito
directo as boas accións medioambientais. Para iso son necesarios
tres elementos: a cidadanía, os espazos onde depositar os residuos,
nos que premiarán estas boas prácticas con cheques-agasallo; e os
comercios e establecementos de hostalería que colaboran aportando
premios e/ou descontos.