A web galega mipedazodecielo.com convídanos a deixar unha mensaxe nun ceo virtual
martes, 30 de outubro do 2012
O deseñador vigués Jonathan
Fernández Monzón sorprendeunos esta semana cunha iniciativa
web, aberta á colaboración activa dos internautas, que consiste
basicamente en facer da bóveda celeste que está sobre as nosas
cabezas un gran taboleiro de mensaxes para compartir con coñecidos,
amizades, familiares ou, tamén, con aquela “persoa especial”
á que nos tería gustado, de poder facelo realmente (alén do
virtual), deixarlle unha mensaxe aló enriba, entre nubes, e ben á
vista. Todo isto, claro, aplicado ao eido dixital, convertendo a nosa
pantalla nun firmamento-lenzo para dar renda solta á creatividade.
O experimento, que ten moito de
proposta artística, amosa, segundo nos conta o seu responsábel,
“unha gran enerxía positiva”. O feito de ter un ceo azul
diante, de certo que axuda. A proposta chámase mipedazodecielo.com.
Máis polo miúdo estamos ante unha
páxina web con feitura de ceo, repartido en pequenos anacos, cada un
coas coordenadas de seu, e na que calquera persoa pode deixar unha
mensaxe. Para achegar un contido temos dúas opcións. A primeira
consiste en facelo a través da ferramenta escribir mensaxe no ceo, e
a segunda en seleccionar de xeito manual o anaco de firmamento que
máis nos guste e comprobar se está ceibo.