A web galega mundoentrenamiento.com acumula máis de 300.000 seareiros
venres, 13 de xullo do 2018
A
páxina web deportiva mundoentrenamiento.com
é hoxe en día un referente formativo e informativo para
adestradores e adestrados de toda España e da outra beira do
Atlántico. Trátase dun dos grandes fitos galegos do ámbito
dixital, xa
que foi quen de “facer” unha comunidade de 300.000 seareiros cos
seus medios e a través das súas presenzas nas redes sociais,
acadando unha media de 20.000 visitas por día. A páxina, moi
envorcada na divulgación deportiva, foi posta en marcha hai uns
catro anos polos galegos Pablo Sánchez, Brais Ruibal e Alejandro
Novás. Segundo puidemos saber, o feito de que a comunidade medrase
de maneira tan exponencial (e de que tamén crecese a experiencia de
Pablo, Brais e Alejandro) sentou os alicerces para o vindeiro
lanzamento dunha aplicación móbil.
Asemade,
tamén se incrementou o equipo de traballo que dá soporte a
mundoentrenamiento.es, que está integrado arestora por preto de
medio centenar de redactoras e redactores, expertos en nutrición,
fisioterapia, adestramento, saúde e deporte. O obxectivo dos tres
impulsores da páxina web é “divulgar información interesante que
afaste os mitos do deporte”. Ou sexa, achegar datos (a través de
contidos directos ou ben mediante información remitida aos correos
dos lectores) para despexar dúbidas, desbotar ideas preconcibidas e
aclarar conceptos. Trátase pois dun portal feito para “ensinar e
axudar”. A súa vindeira actividade será, como dixemos, a posta en
marcha e lanzamento dunha aplicación móbil que sirva de complemento
aos recursos fornecidos pola web.