A webserie Premios Darwin estréase este xoves en Carballo

A webserie galega Premios Darwin, rodada na súa totalidade no concello de Carballo, vai ser presentada esta semana na vila bergantiñá: unha cita prevista para este xoves 5 de setembro, ás 20.30 horas no Pazo da Cultura. A serie, dirixida por Carmen Conde, foi finalista no Festival de Contidos Dixitais Carballo Interplay de 2018.
Trátase dunha homenaxe audiovisual aos galardóns que levan o nome do célebre naturalista británico, Charles Darwin, que salientou nos seus traballos as relevantes capacidades dos individuos e das especies que lograron prosperar ao longo dos séculos (a chamada selección natural) e, á inversa, tamén destacou a peculiar habilidade doutros individuos e doutras especies que teimaron en sacarse do medio e finalmente o conseguiron.
Os Premios Darwin, que existen de facto dende hai anos (dende 1998) condecorando a xente de todo o mundo, son un xeito de render tributo a esta teimosía auto-destrutiva. A fita de Carmen Conde colle a testemuña destes galardóns e céntrase, con moita retranca e humor negro, nos casos galegos de persoas que se emperrecharon (inconscientemente ou non) en desaparecer.
A serie galega, patrocinada polo Concello de Carballo e producida por Tarabela Creativa, preséntanos pois algunhas das mortes máis absurdas ocorridas en Galicia. Composta por tres capítulos, Premios Darwin ten elevadas doses de humor negro e conta coa participación de intérpretes ben coñecidos no audiovisual galego como Víctor Mosqueira, Evaristo Calvo, Avelino González, María Vázquez, César Cambeiro ou Ana Santos.
Na estrea presentaranse en primicia os seus tres episodios, acompañándose dunha actuación ao vivo da banda sonora da ficción a cargo de Nastasia Zürcher, que estará acompañada no auditorio do Pazo da Cultura por Adrián Saavedra.