A webserie galega A moza que abortou e o contou chega ao catálogo de Filmin

venres, 24 de xaneiro do 2025 S. P.

Logo de ser estreada en abril do 2024 no Carballo Interplay, recibindo o premio ao Mellor Proxecto de Serie Web no dito festival, premiada no Jonh Balan Fest e seleccionada no Serializados Fest, a webserie A moza que abortou e o contou (@amqaeoc), creada por Eire Cid e Rosalía Quiroga chega ás plataformas streaming nacionais, cunha estrea no catálogo de Filmin este venres 24 de xaneiro.
Esta produción galega conta a historia de Cora, unha moza de 20 anos que aborta e decide contarllo á súa familia durante a cea de Nadal. O seu relato ten como consecuencia: debates, novas revelacións e violencia, e todo gravado pola súa irmá co teléfono. O resultado é a creación dun falso documental, cunha narrativa posmoderna, en formato vertical.
Engadir que A moza que abortou e o contou actualmente é candidata á Mellor Serie Web nos Premios Mestre Mateo 2025 da Academia Galega do Audiovisual que se celebrarán o vindeiro mes de marzo, unha aposta creativa que permitirá a novas espectadoras e espectadores sumarse a este relato posmoderno, entendido para un novo consumo en teléfonos móbiles e tamén adaptábel a outros soportes.