A xornada final de Tech Kids contará coa participación de 200 rapazas e rapaces
mércores, 14 de novembro do 2018
Esta
finde, o 18 de novembro, a Cidade da Cultura será un
fervedoiro de tecnoloxía divertida e creativa. O motivo? A
celebración da xornada final do programa Tech Kids, unha
iniciativa itinerante que percorreu a nosa terra os meses pasados
mostrando á rapazada a importancia de programar e ter coñecementos
teorico-prácticos de informática, ciencia e robótica.
Tanto
a cita final de Tech Kids coma as xeiras previas viñeron da man do
Colexio Profesional de Enxeñaría en Informática de Galicia (CPEIG)
e a Axencia para a Modernización Tecnolóxica de Galicia (AMTEGA). A
sesión deste 17 desenvolverase pola mañá, a partir das 11.00, no
Hall de Tirantes do Museo da Cidade da Cultura, en Santiago.
Participarán unhas 200 persoas.
A
actividade está destinada a “estimular o talento precoz no ámbito
das Tecnoloxías da Información e Comunicacións, as TIC, así como
fomentar o atractivo vocacional de profesións
científico-tecnolóxicas entre a poboación máis nova”.
En
concreto, como dixemos, a organización ten prevista a participación
de aproximadamente 200 rapazas e rapaces de entre 10 e 17 anos.
Organizarase unha xincana tecnolóxica con tres sets independentes:
vídeo-mapping interactivo, panel de chroma key e jam
musical, ademais de varios talleres de drons. O evento será gravado,
precisamente, cun vehículo aéreo non tripulado e crearase un vídeo
de promoción que servirá de peche á xornada educativa e lúdica.
Os asistentes recibirán unha bolsa de picnic e terán zona de xogos
dispoñíbel para o seu esparexemento.
No
set de vídeo-mapping interactivo, os participantes poderán
controlar en tempo real distintas figuras xeométricas proxectadas,
sen tocar ningún dispositivo e utilizando as tecnoloxías madmapper,
leap motion e midifighter. O sistema, en palabras das
entidades organizadoras, un crebacabezas interactivo onde os rapaces
deberán organizar os cadros de maneira que se mostre correctamente a
proxección resultante, co obxecto de compoñer un vídeo nas caras
frontais dos cubos mediante movementos aéreos.
No
panel de chroma key, a rapazada posará diante dun sistema de
subtracción de fondo para aparecer dentro dun escenario proxectado
en tempo real. Disporase dunha pantalla de fondo verde para que os
participantes se poidan ver dentro dun escenario, imaxe que será
proxectada nunha parede do recinto.
Polo
que respecta á jam musical, as mozas e mozos participantes
poderán tocar música mediante un sistema informático de música en
directo, configurado para que ata tres persoas participen de xeito
simultáneo. O sistema restrinxirá as escalas musicais dos
instrumentos e recolocará a posición das notas.
Os
rapaces poderán participar tamén en obradoiros teórico-prácticos
de drons aéreos e terrestres, onde se lles explicará todo o
relacionado co uso legal destes aparellos, así como conceptos
básicos de electrónica, mecánica e responsabilidade. O obxecto é
“que a nosa mocidade coñeza este sector e as súas posibilidades
laborais”. Ofrecerase unha exhibición de voo de drons de
diferentes tamaños na que participarán os máis pequenos.
Ademais
de todo o devandito, a xornada contará cunha conferencia sobre novos
escenarios e contidos virtuais, que impartirán o director e fundador
do Festival Internacional de Animación, Videoxogos e
Infoarquitectura, Mundos Digitales, Manuel Meijide, e o co-fundador
da produtora audiovisual Illusorium Studios, Raúl Rocha, ás 12:00
horas.
673
rapaces participaron en 57 xornadas
O
CPEIG e AMTEGA organizaron nos meses de xullo, agosto e setembro
unhas xornadas sobre robótica, pilotaxe de drons e creación de
personaxes para videoxogos ou películas de animación, enmarcadas no
programa Tech Kids, destinado a fomentar o interese pola ciencia e a
tecnoloxía entre a mocidade galega. Organizáronse 57 xornadas nas
aulas CeMIT de diversos concellos das catro provincias galegas nas
que participaron 673 alumnas e alumnos.