ABANCA aumentou nun 39,1% a cifra de interaccións dixitais mensuais
mércores, 24 de xaneiro do 2018
ABANCA fixo hoxe balance do acadado en 2017, tanto
a nivel de números (obtivo un resultado neto de 367 millóns de
euros, un 10,0% máis que no exercicio anterior) como a nivel de
pasos innovadores. Neste último punto, os responsábeis da entidade
bancaria galega fixeron saber que se conseguiu “un importante
avance do modelo de negocio dixital de ABANCA”, o que se traduciu,
engadiron, “nun aumento do 39,1% no número de interaccións
dixitais mensuais”. Polo que atinxe á actividade comercial con
clientes, tamén medrou, dando como resultado un volume de negocio
total de 65.556 millóns de euros.
Os responsábeis da entidade bancaria tamén
fixeron reconto dos principais fitos tecnolóxicos logrados ao longo
do ano que vimos de deixar atrás, un ano que se caracterizou por “un
fortalecemento da capacidade de adaptación aos cambios que as novas
tecnoloxías están a exercer nos hábitos de consumo da cidadanía”.
Na cita cos medios de comunicación (na
que participaron Juan
Carlos Escotet Rodríguez, Francisco
Botas e Alberto de Francisco,
presidente, conselleiro
delegado e director xeral financeiro de
ABANCA)
lembrouse a relevancia do lanzamento, en 2017, da aplicación de
banca que permite ás empresas asinar operacións desde o seu móbil,
do servizo Wallet de ABANCA Pay, da implantación da identificación
facial Face ID para acceder á banca móbil con iPhone X ou do
servizo de videochamada como procedemento para facerse cliente.
Rodríguez, Botas e de Francisco tamén salientaron o fornecemento da
posibilidade de realizar envíos de diñeiro de móbil a caixeiro a
través de voz. “Estes avances no modelo de negocio dixital”,
recordaron, “víronse apoiados cun aumento do 39,1% no número de
interaccións dixitais mensuais”.
Por outra banda, no plano visíbel da tecnoloxía,
lembraron que ABANCA continuou coa implantación do seu novo modelo
de oficina na súa rede comercial e coa renovación do seu parque
tecnolóxico (caixeiros, TPV, Microsoft Surface, etc.).