ADICAE Galicia informa da celebración dunhas xornadas en liña sobre fraude na Rede

A Internet non é fonte de fraudes de por si, igual que saírmos á rúa non significa que teñamos que ser obxecto dun roubo. Con todo, a ninguén se lle ocorre na vida real dar os números de conta bancaria a calquera que formal e educadamente llos pide. Pois ben, dar unhas cantas claves sobre como actuar na Internet cos nosos datos persoais é un dos grandes obxectivos das xornadas que organiza ADICAE (asociación de consumidores de ámbito estatal especializada en temas financeiros) estes días 17 e 18 de decembro sobre consumo en Internet. As sesións divulgativas, celebradas en colaboración co Instituto Nacional de Consumo, veñen máis a conto ca nunca: por estas datas previas ao Nadal sempre se dispara a actividade comercial e bancaria na Internet, aquela que de non poñer ren da nosa parte pódenos deixar cunha man diante e cunha detrás.
As xornadas, que se van retransmitir por Internet e videoconferencia, desenvólvense baixo o seguinte epígrafe: O novo consumidor na contratación de produtos e servizos financeiros por Internet. Entre outras dúbidas, tratarase de resolver as seguintes cuestións: É seguro mercar e contratar por Internet?Abóndanos coa información que nos dan antes de contratar por Internet? Coñecemos de verdade os nosos dereitos como consumidores internautas?
Tódalas persoas interesadas nisto poderán seguir estas sesións, en directo, dende os seus ordenadores ou tamén dende calquera das sedes territoriais (incluída a galega), previa inscrición de balde. Segundo informa ADICAE Galicia, que ten sede no número 2, oficinas, da Praza de Vigo de Santiago, os encontros acollerán diversos relatorios de expertos na materia, debates e unha gymkana dos servizos financeiros en liña para os asistentes, que recibirán logo un agasallo co material de ADICAE publicado sobre o mesmo.