AGESTIC salienta os bos agoiros para o sector galego que reflicte o novo Informe de Contidos Dixitais
xoves, 17 de novembro do 2011
- Na imaxe, de esquerda a dereita, José María López Bourio presidente de AGESTIC, Martín Pérez Sánchez, vicepresidente de AMETIC e Jorge Pérez Martínez, catedrático da ETSIT-UPM e coordinador do informe
A Asociación Galega de Empresas TIC, AGESTIC, vén de participar na presentación
da cuarta edición do Informe de Contidos
Dixitais que elabora AMETIC (descargable en formato PDF).
En representación da plataforma empresarial galega acudiu o seu presidente, José
María López, quen tivo oportunidade de dar conta, de primeira man, dunha das
grandes novidades do informe deste ano, unha novidade que nos colle ben de
preto: a certificación do excelente traballo despregado nos últimos tempos
polas empresas galegas do sector dos contidos dixitais.
Así se fai saber nunha das análises incluídas no informe,
estreada este ano, na que se avalía o tecido empresarial de aplicacións móbiles
e no que Galicia conta con firmas punteiras que traballan arestora a nivel
nacional e internacional, informa AGESTIC. Isto cómpre sumalo ás análises xa
elaboradas nas anteriores entregas e que certifican tamén o potencial do noso
sector: música, cinema, vídeo, videoxogos, televisión, marketing en liña, xornais, libros electrónicos, etc.
O obxectivo da investigación de AMETIC, engade a entidade
galega, é o estudo da relación que hai entre dispositivos de reprodución,
contidos dixitais e conectividade, “sempre
dende o punto de vista converxencia tecnolóxica a nivel nacional, sector no que
as empresas galegas teñen cada ano un papel máis destacado e incrementan a súa
facturación e a súa presenza”. O informe diríxese a actuar como canle de
definición e recomendación dos novos modelos de negocio que están a xurdir no
eido online e contribuír ao
desenvolvemento da industria de contidos dixitais en España.
Segundo engade AGESTIC, estamos pois ante unha ferramenta
moi útil para guiar a actuación dos poderes públicos en materia de apoio ao
sector, “por ser este un sector que lonxe
de sentir a crise, está a medrar no seu conxunto”. Seguindo este fío, a asociación galega
comunica que remitirá o devandito informe á Secretaría Xeral de Modernización
da Xunta para que se teña en conta á hora de ir deseñando as políticas de apoio
sectorial.