AMETIC premia os esforzos do Goberno galego por levar o Camiño á era dixital
xoves, 17 de outubro do 2019
A
asociación AMETIC, patronal do sector da industria
tecnolóxico-dixital en España, vén de premiar á Xunta no
Congreso Digital Tourist por incorporar a innovación e a
tecnoloxía no Camiño de Santiago. O galardón, que tamén salienta
a xestión levada a cabo en relación ás rutas xacobeas, foi
recollido na noite deste xoves 17 de outubro pola directora de
Turismo de Galicia, Nava Castro. Os Premios Digital Tourist, ao
abeiro dos cales o Goberno obtivo esta distinción, enxalza o labor
de empresas, entidades locais e institucións que salienten na
mellora, pola vía das tecnoloxías, da nosa experiencia viaxeira.
Segundo
fixo saber a directora de Turismo, galardóns coma este son “un
gran aliciente para continuar traballando para adaptar a
peregrinación ao século XXI ao tempo que se avanza para que manteña
a súa esencia histórica e espiritual”. Durante o acto lembrou “a
aposta da Xunta por incorporar a innovación á ruta xacobea”, un
obxectivo do que abrollaron ferramentas concretas como unha
aplicación móbil con información en tempo real sobre a ruta, un
portal especializado no Camiño de Santiago ou servizos para
peregrinos durante o percorrido como Wi-Fi de balde nos albergues da
rede pública do Xacobeo.
Castro
tamén fixo fincapé nos esforzos despregados en accesibilidade,
“poñendo a disposición dos peregrinos habitacións especialmente
adaptadas para persoas con necesidades especiais”, e puxo o foco en
vindeiras medidas como a instalación de pictogramas para persoas con
discapacidade cognitiva ou habilitar drons para trasladar material
médico ante posíbeis urxencias cardíacas entre os peregrinos.
Os
Premios Digital Tourist son convocados por primeira vez pola
asociación AMETIC e enmárcanse no II Congreso Digital Tourist que
se está celebrando en Benidorm. Nel concorren un nutrido grupo de
representantes do ámbito empresarial e institucional que afondan
sobre diferentes temáticas asociadas ao turismo intelixente.