AMETIC presenta o caso galego como exemplo de boas prácticas en Compra Pública Innovadora
xoves, 6 de outubro do 2022
A
patronal tecnolóxica española AMETIC (Asociación de Empresas TIC)
organizou este xoves 6 de outubro unha
xornada en liña sobre a fórmula da Compra Pública Innovadora
como instrumento de colaboración público-privada. Púxose o foco no
“caso galego” con representantes da Axencia Galega de Innovación.
Participou a directora de GAIN, Patricia Argerey, que destacou que a
estratexia da CPI é “o mellor instrumento de apoio á I+D+i do que
dispoñen as administracións públicas e o máis acaído aos
intereses das empresas”.
Argerey
fixo estas declaracións no marco da xornada La Compra Pública
Innovadora (CPI) como instrumento de colaboración público-privada:
el caso gallego, na que se presentou a iniciativa desenvolvida en
Galicia como exemplo de boas prácticas no uso deste instrumento de
contratación pública. A directora lembrou que a nosa Comunidade
executou máis de 300 millóns de euros de fondos propios e europeos
en proxectos de CPI en algo máis dunha década.
Argerey
subliñou entre as vantaxes deste instrumento que “permite mellorar
os servizos públicos mediante a incorporación de bens ou servizos
innovadores; fomentar a innovación empresarial desde a demanda;
impulsar a internacionalización da innovación; e compartir os
riscos e beneficios inherentes á innovación co tecido empresarial”.
Así mesmo, dixo, “supón unha oportunidade moi valiosa para
consolidar a cultura da innovación dentro da administración
pública”.
Dentro
dos proxectos executados por Galicia a través de CPI, a directora
destacou o Polo Aeroespacial de Galicia, “unha iniciativa
estratéxica pioneira en Europa”, liderada pola Xunta en
colaboración con outras administracións, na que están a participar
máis de 50 axentes (empresas e centros tecnolóxicos e de
coñecemento), para desenvolver unha industria e un ecosistema de
coñecemento ao redor de solucións innovadoras baseadas nas
tecnoloxías dos vehículos non tripulados.
Patricia
Argerey puxo o Polo Aeroespacial de Galicia como exemplo de política
de I+D+i que serve de panca á política industrial, en liña coa
especialización e concentración de recursos en sectores de alta
tecnoloxía recollidas na Estratexia de Especialización Intelixente
(RIS3) de Galicia, e empregando a Compra Pública de Innovación para
maximizar o impacto dos fondos públicos.