AMTEGA e RETEGAL mellorarán a cobertura móbil en 290 núcleos de poboación

Este 5 de abril soubemos máis datos relevantes sobre o espallamento da cobertura de telefonía móbil de Galicia. Segundo informaron a Axencia para Modernización Tecnolóxica de Galicia (AMTEGA) e a Federación Galega de Municipios e Provincias (FEGAMP), a dita cobertura será obxecto de melloras en 290 núcleos de poboación de 65 concellos. Así o fixeron saber durante unha xornada de traballo na que avanzaron as medidas conxuntas impulsadas pola axencia autonómica en materia de impulso ás telecomunicacións.
Na reunión, na que participaron a directora da AMTEGA, Mar Pereira, e o presidente da FEGAMP, Alberto Varela, concretouse o plan de actuación que deberán seguir os municipios nos que se realizarán as actuacións.
Este plan contempla a presentación dun proxecto por parte dos concellos, que inclúe a posta a disposición da Xunta das parcelas nas que o operador público RETEGAL construirá as torres de telecomunicación, os permisos correspondentes e a execución das acometidas eléctricas. Esta colaboración cos concellos xa se está a concretar en traballos de campo levados a cabo por RETEGAL para identificar os emprazamentos futuros das ditas torres. Neste senso, a día de hoxe máis do 97% das administracións locais xa enviaron datos de contacto a RETEGAL para iniciar o proceso de validación do proceso e desde o operador público se lles trasladaron as áreas de busca máis apropiadas para as parcelas. AMTEGA confirmou que “máis do 30% dos concellos enviaron unha proposta de terreos para situar as torres de telecomunicación, e o 85% destas propostas xa recibiron unha validación previa”.
Convenio AMTEGA-FEGAMP
A dita liña de traballo arrincaba en 2019 coa sinatura dun convenio entre AMTEGA e a FEGAMP que permitiu identificar as carencias de cobertura móbil en todos os concellos que se adheriron ao programa. Tras solicitar á Comisión Europea autorización para realizar esta actuación a Xunta adxudicaba o pasado mes de decembro a primeira liña de axudas para extensión de telefonía móbil aprobada por Europa a Vodafone. O operador ofertou a mellora da cobertura na totalidade dos concellos adheridos ao programa que cumpriron cos requisitos establecidos. En total, 290 núcleos de 65 municipios das catro provincias galegas.
Diagnose da cobertura actual
As dúas entidades tamén abordaron na xuntanza a situación da cobertura móbil en Galicia e compartiron a diagnose en relación ao impacto que ten a dispersión no despregamento das redes de telecomunicacións. Neste sentido, ambas entidades coinciden na necesidade de que o Ministerio de Asuntos Económicos e Transformación dixital teña en conta este criterio no desenvolvemento do Programa de Universalización de Infraestruturas Dixitais para a Cohesión (UNICO).
AMTEGA lembrou que ten trasladado ao Goberno do Estado “esta necesidade” en “diferentes ocasións”, así como a modificación do actual Servizo Universal de Banda Larga co “obxecto de incluír non só un incremento da velocidade do acceso fixo a Internet nos fogares que é de tan só de 1MB, senón tamén a cobertura móbil de Internet e voz”.
AMTEGA tamén recordou que o último dato dispoñible, de mediados de 2020, sinala que o 72,2% dos galegos, dispoñen de cobertura de redes de máis de 100Mbps, fronte ao 54,8% do ano 2014. Amais, sinalou a axencia, a cobertura incrementouse en case un 32% dende 2014, “grazas aos despregamentos derivados do Plan de Banda Larga 2014 (con 81 millóns de euros de Fondos FEDER, xestionados pola Administración autonómica) e do Plan de Banda Larga da Xunta 2020, (con 18,6 millóns de euros de Fondos FEADER, como actuación complementaria ao Programa Estatal de Extensión de Banda Larga de Nova Xeración)”.