ARCHOS prepara novos smartphones con Android 4.2 para o mes de abril

Na pasada edición do Mobile World Congress de Barcelona o fabricante ARCHOS amosou os seus novos smartphones con Android 4.2 e dobre SIM que espérase que cheguen ao mercado no mes de abril a prezos bastante axustados, e que durante este mes están a pasar polas mans de expertos de distintos blogs tecnolóxicos que están a dar conta do que ofrecen estes terminais móbiles.
Os novos móbiles comezan por un modesto ARCHOS 40b Titanium, que cunha pantalla IPS de 4 polgadas (cunha resolución de 800 x 480 píxeles), procesador de dobre núcleo a 1,3 GHz, 512 Mb de RAM, 4 Gb de almacenamento interno (ampliable mediante tarxetas de memoria microSD), cámaras de 5 e 0,3 Mpíxeles, Bluetooth 3.0, batería de 1.400 mAh e un grosor de só 8,5 milímetros buscará o seu espazo como móbil de entrada por ter un prezo de 129,99 euros.
Como dispositivos de grande tamaño teremos o ARCHOS 64 Xenon, cunha pantalla IPS de 6,4 polgadas (cunha resolución de 1.280 x 720 píxeles), procesador de catro núcleos a 1,3 GHz, 1 Gb de RAM, 4 Gb de almacenamento interno (ampliable mediante tarxetas de memoria microSD), cámaras de 8 e 2 Mpíxeles, Bluetooth 3.0, batería de 2.800 mAh e un grosor de 9,3 milímetros pretende atender á demanda de smartphones de grande tamaño (como o Samsung GALAXY Mega) cun prezo de 229,99 euros, que pode considerarse como un dispositivo de media gama para usuarios pouco esixentes.
Mentres que o tope de gama será o ARCHOS 50c Oxygen, que chegará cunha pantalla IPS de 5 polgadas (cunha resolución de 1.280 x 720 píxeles), procesador de oito núcleos a 1,7 GHz, 1 Gb de RAM, 8 Gb de almacenamento interno (ampliable mediante tarxetas de memoria microSD), cámaras de 8 e 2 Mpíxeles, Bluetooth 4.0, batería de 2.000 mAh e 7,64 milímetros de grosor, que buscará atraer aos consumidores coa súa potencia e coidado deseño (que incluso lembra a un vello Sony XPERIA) a un prezo de 249,99 euros.