AS-PG publica na Rede o Xogo da Curuxa como alternativa á Oca

A Asociación Socio-Pedagóxica Galega (AS-PG), un colectivo que se define a sí mesmo como un “movemento de renovación pedaxógica pioneiro de Galiza”, vén de por na Rede un novo xogo en liña que, de seguro, vai satisfacer as necesidades de ensino e aprendizaxe dos máis de mil asociados e asociados que a entidade tén por todo o país e que están vencellados directa ou indirectamente cos ensinos Primario, Secundario e Universitario.
Trátase do Xogo da Curuxa, unha divertida aplicación baseada no tradicional Xogo da Oca que, polo de agora, permite botar unicamente partidas individuais pero que os seus responsables aseguran que “axiña será tamén multixogador” .
A ferramenta, que se suma aos xa existentes Trivial.gz e Letrad@s.gz (creados pola mesma asociación), consiste en lanzar un dado e ir movendo a ficha ao longo dun taboleiro virtual en espiral que, ao igual que o seu correspondente xogo de mesa, está formado por diferentes cadros. Estes cadros, como sucede co seu equivalente real, conteñen agochadas accións especiais como bonificacións ou castigos, mais, a diferenza deste último, cando un xogador ou xogadora cae nunha casiña ten que superar unha proba para poder quedar nela ou evitar un castigo.
Os usuarios e usuarias que cheguen ata o último cadro e superen a proba que este contén, gañarán a partida.
No caso da versión final de varios xogadores, que se prevé que estea lista antes do vindeiro verán, gañará aquel usuario ou usuaria que chegue antes á devandita casiña e acerte.