ASPRONAGA proba no CITIC desenvolvementos de realidade virtual

venres, 6 de maio do 2022 S. P.

O pasado xoves 28 de abril, cinco alumnos e dous profesores da CEE Nosa Señora de Lourdes, centro pertencente a ASPRONAGA, visitaron as instalacións do Centro de Investigación TIC (CITIC) da Universidade da Coruña para coñecer o traballo desenvolvido no centro no ámbito da tecnoloxía aplicada á saúde.
A visita comezou cunha presentación do centro por parte do subdirector Javier Pereira para, a continuación, acudir ao Demostrador Tecnolóxico do CITIC xunto co investigador Manuel Lagos para probar diferentes desenvolvementos de realidade virtual creados por persoal investigador do centro, ademais de diversas propostas comerciais deportivas e de lecer.
Esta visita tivo a finalidade de “recoller as opinións e suxestións tanto do alumnado como do profesorado para mellorar os desenvolvementos actuais e para traballar na implementación de novas contornas de Realidade Virtual”, explicaron fontes do CITIC, engadindo que “as aplicacións seleccionadas permitiron aos participantes ter un primeiro contacto coa experiencia de tecnoloxías inmersivas e traballar diferentes habilidades físicas e cognitivas dun modo ameno, motivador e seguro”. Ademais, probaron unha tecnoloxía pouco estendida no ámbito comercial da realidade virtual: o dispositivo Leap Motion, que permite interactuar cos escenarios de RV directamente coas mans, sen necesidade de mandos.

PUBLICIDADE