AWS e Azure baixo a lupa da Comisión Europea

A Comisión Europea iniciou tres investigacións centradas nos servizos de computación na nube ao abeiro da Lei de Mercados Dixitais (DMA). Dúas delas analizarán se Amazon e Microsoft deben ser designadas como gatekeepers polos seus servizos Amazon Web Services e Microsoft Azure, malia non acadar os limiares cuantitativos que marca a normativa en tamaño, número de usuarios ou posición de mercado. A terceira investigación avaliará se o actual marco da DMA resulta suficiente para corrixir prácticas que poidan limitar a competencia e a equidade neste sector estratéxico.
A computación na nube constitúe a infraestrutura esencial de numerosos servizos dixitais e desempeña un papel clave no desenvolvemento da intelixencia artificial. Para impulsar a innovación, a confianza e a autonomía estratéxica europea, Bruxelas insiste na necesidade dun ecosistema de nube aberto, xusto e competitivo.
As análises realizadas nos últimos anos indican que Amazon Web Services e Microsoft Azure ocupan posicións especialmente fortes fronte ás empresas e aos consumidores. A Comisión examinará tamén se certas características propias do sector da nube poderían reforzar aínda máis esa posición dominante de facto. Se a investigación conclúe que actúan como portas de entrada fundamentais entre compañías e usuarios, estes servizos engadiríanse á lista de plataformas nucleares polas que Amazon e Microsoft xa están consideradas gatekeepers noutros ámbitos.
En paralelo, Bruxelas está a recompilar información de diferentes actores para avaliar se as obrigas actuais da DMA abordan axeitadamente condutas potencialmente restritivas da competencia, como barreiras á interoperabilidade entre servizos, limitacións ou condicións de acceso aos datos para empresas usuarias, prácticas de empaquetado ou vinculación de servizos e termos contractuais desequilibrados.
A Comisión prevé concluír nun prazo de doce meses as investigacións relativas a Microsoft Azure e Amazon Web Services. Se finalmente determina que cumpren os criterios para seren designados gatekeepers no ámbito da nube, ambas compañías disporán de seis meses para garantir o pleno cumprimento das obrigas da DMA.
A terceira investigación, centrada na aplicación da DMA ao sector da nube, dará lugar a un informe final no prazo de dezaoito meses. Ese documento poderá incluír propostas de actualización das obrigas da DMA mediante un acto delegado ao abeiro dos artigos 12 e 49 da propia norma.