AWS e OpenAI selan unha alianza estratéxica de 38.000 millóns de dólares

Amazon Web Services (AWS) e OpenAI anunciaron un acordo estratéxico plurianual valorado en 38.000 millóns de dólares que permitirá á creadora de ChatGPT executar e escalar as súas cargas de traballo de intelixencia artificial máis avanzadas sobre a infraestrutura global de AWS. O acordo, que entra en vigor de maneira inmediata e se estenderá durante os próximos sete anos, prevé o acceso de OpenAI a centos de miles de procesadores gráficos nVIDIA de última xeración e á posibilidade de escalar ata decenas de millóns de CPU para tarefas de aprendizaxe e xeración de modelos.
A colaboración consolida a AWS como un dos principais provedores de capacidade de cómputo para a nova xeración de sistemas de IA, grazas á súa experiencia na xestión segura e fiable de infraestruturas de gran escala, con clusters que superan as 500.000 unidades de procesamento. Pola súa banda, OpenAI beneficiarase do rendemento, a eficiencia e a seguridade da nube de Amazon, ampliando de forma significativa a súa capacidade de cálculo para desenvolver e operar modelos cada vez máis complexos.
A infraestrutura específica que AWS está a despregar para OpenAI inclúe servidores Amazon EC2 UltraServers, equipados con procesadores NVIDIA GB200 e GB300 interconectados para ofrecer un rendemento de baixa latencia. Estes clusters permitirán a OpenAI tanto servir inferencias de ChatGPT como adestrar os seus modelos de próxima xeración cun deseño flexible e escalable.
A alianza amplía a colaboración xa existente entre ambas compañías. A comezos deste ano, AWS incorporou modelos fundacionais de OpenAI á súa plataforma Amazon Bedrock, ofrecendo aos clientes corporativos novas opcións de modelos para tarefas de análise científica, resolución matemática, programación ou fluxos de traballo con axentes. Entre as empresas que xa empregan estas tecnoloxías atópanse Bystreet, Comscore, Peloton, Thomson Reuters, Triomics e Verana Health.
Con esta asociación, AWS e OpenAI consolidan unha das maiores colaboracións industriais do sector tecnolóxico, posible grazas á última reformulación da colaboración entre OpenAI e Microsoft.