Abanca Innova abre a inscrición para a súa novena edición

Abanca abriu hoxe o prazo de inscrición para participar na vindeira edición do Programa para Startups de Abanca Innova (que curiosamente ten unha páxina web en español e portugués, ignorando a lingua galega), deseñado para apoiar a empresas emerxentes con ideas disruptivas nos sectores de fintech, insurtech, regtech ou cibersecurity. As startups interesadas en participar nesta novena edición poderán inscribirse vía web até o 17 de decembro. Para ser seleccionadas, deben contar cun produto no mercado, aínda que sexa en etapas temperás, e dispoñer dun equipo formado con capacidade para levalo adiante.
Tras o proceso de recepción e análise das propostas, un comité integrado por profesionais de diversas áreas do banco será o encargado de seleccionar os proxectos participantes no primeiro taller, que se levará a cabo no mes de xaneiro. As startups seleccionadas gozarán de importantes beneficios, xa que o programa ofrece un completo paquete de apoio destinado a dotalas de coñecemento de xestión e recursos económicos e materiais para madurar o seu proxecto de emprendemento. Faino seguindo a fórmula de anteriores edicións, a través de sesións con expertos do sector ou reunións con distintas unidades de negocio de Abanca (Negocio, Innovación, TI e Investment Banking).
Deste xeito, os participantes poderán asistir a diferentes clases maxistrais e mesas redondas con destacados relatores do ecosistema nacional de emprendemento. Ademais, tamén se desenvolverán as tradicionais sesións de Café Fintech, é dicir, charlas informais con directivos e empregados de Abanca que lles permitirán coñecer o funcionamento da entidade.