Abanca activa os envíos de diñeiro internacionais a través de Bizum

Os clientes de Abanca xa poden intercambiar pagos instantáneos a través de Bizum con usuarios de Portugal e Italia. O banco vén de completar os desenvolvementos necesarios para “estender esta tecnoloxía a todos os usuarios do servizo, converténdose nunha das entidades pioneiras do sector no país en posibilitar esta operativa”, informou a entidade financeira galega, engadindo que os envíos e recepcións realizaranse a través de Bancomat (Italia) e MB Way (Portugal). Tamén está dispoñible para usuarios andorranos.
Xunto a Bizum, estas dúas plataformas nacionais son as primeiras en incorporarse a EuroPA, o sistema de pago europeo interconectado. Abanca explica que esta iniciativa está destinada a transformar os servizos de pago móbiles no ámbito europeo, e está previsto que en datas vindeiras se integren outras plataformas nacionais, como Blik en Polonia, IRIS en Grecia e Vipps MobilePay nos países nórdicos.
Máis opcións, mesma sinxeleza
A banca galega sinala que a operativa para realizar envíos internacionais de diñeiro instantáneo “mantén a mesma sinxeleza que ofrecía ata o momento, xa que non hai cambios no funcionamento do servizo nin é necesario actualizar a banca móbil de Abanca”. Para xerar e recibir pagos internacionais, os clientes deberán escoller un destinatario destes países da súa lista de contactos ou introducir directamente o seu número de teléfono co prefixo internacional correspondente. Tras introducir o importe e a forma de pago, a operación realizarase en cuestión de segundos, “tal e como se facía ata agora, co mesmo nivel de seguridade e confianza actuais”. Ademais do envío de diñeiro entre particulares, que agora inclúe novas capacidades internacionais, Bizum tamén permite pagar en tendas en liña, enviar doazóns e mesmo pagar recibos ou impostos sen domiciliación bancaria.
Abanca incorporou Bizum a finais de 2016 e segundo informa “consolidouse como un dos servizos máis demandados entre os clientes para enviar ou recibir diñeiro de xeito sinxelo e rápido, co simple coñecemento do número de teléfono do destinatario”.
Hoxe é compatible con 40 bancos españois e andorranos.