Abanca, pioneira en empregar a IA xenerativa para atender as consultas dos seus clientes

Abanca vén de pór en macha un servizo pioneiro que integra a Intelixencia Artificial Xenerativa (IAX) na atención das consultas dos seus clientes e non clientes, unha iniciativa que, segundo informa a entidade bancaria galega, sitúaa como “a primeira de España” que inicia e completa este proceso de transformación. Abanca engade que este servizo pioneiro arrancou xa de xeito limitado para un grupo de clientes e estenderase nas vindeiras semanas coa vista posta en estar totalmente dispoñíbel para calquera usuario, sexa cliente ou non, no mes de decembro. Preséntase baixo o nome de SOFia.
A solución, xa incorporada e probada nos últimos meses noutros procesos e canles internas da entidade, está dispoñíbel en todos os dispositivos a través da páxina web do banco e súmase ao resto de alternativas presenciais e remotas que ofrece a entidade, como a asistencia telefónica ou a través das principais redes sociais.
Abanca engade que “as respostas que ofrece esta nova canle de comunicación están dirixidas a axilizar a atención ás dúbidas e consultas dos usuarios sobre a información dispoñíbel na web dun xeito próximo”. A entidade apunta tamén que “este servizo non opera directamente nin ofrece información sobre os produtos contratados nin datos persoais dos usuarios; en termos prácticos, recibirán unha resposta afinada sobre o que demandan e, se precisan ampliar a información recibida, serán dirixidos aos diferentes espazos da páxina web de Abanca, onde poderán continuar coa operación con total seguridade”.
Calquera usuario que queira utilizar o servizo simplemente ten que iniciar unha conversa co asistente, utilizando unha linguaxe natural. “O novo desenvolvemento é capaz de interpretar o significado e o contexto da consulta e buscar entre miles de páxinas ou repositorios de preguntas frecuentes do banco”, sinala Abanca, engadindo que “a ferramenta non ofrece contestacións predefinidas, senón que crea unha resposta inmediata segundo as necesidades expresadas por cada cliente e o contexto”. O servizo está dispoñíbel en calquera momento e permite aos clientes chatear en diferentes idiomas. Ao utilizar contidos continuamente renovados, as respostas son precisas e sempre actualizadas.
Dentro do proceso de lanzamento, nas últimas semanas realizouse unha enquisa con usuarios. Nas súas respostas deron unha puntuación media de 4,23 sobre 5. Ademais, máis da metade valorou a SOFia coa puntuación máis alta. Entre os puntos fortes do desenvolvemento destacaron a coherencia, a utilidade, a linguaxe empregada e a facilidade para atopar o chatbot dentro de la web.