Abel Losada recoñece como ciberexpert@s a 70 estudantes do Colexio Calsancio e do CEIP de Cabanas

O subdelegado do Gobierno en Pontevedra, Abel Losada, fixo entrega dos carnés de ciberexpert@ aos 50 alumnos e alumnas de sexto de primaria do Colexio Calasancio de Pontevedra e aos 19 do mesmo curso do CEIP de Cabanas (Salcedo-Pontevedra), que superaron as accións formativas sobre ciberseguridade enmarcadas no Plan Director para a Convivencia nos Centros Educativos. Este programa desenvólvese na cidade de Pontevedra polo equipo especializado da Comisaría da Policía Nacional.
Acompañado polo comisario provincial, Juan José Díaz, e pola dirección dos centros educativos, Losada felicitou ao alumnado pola superación deste curso, subliñando que “a aprendizaxe en ciberseguridade non só protexe os menores, senón que lles proporciona as ferramentas necesarias para moverse con responsabilidade no mundo dixital”.
Neste sentido, animou aos nenos e nenas a compartir os coñecementos adquiridos co resto do alumnado de cadanseu colexio e coa súa contorna familiar, axudando a pais, nais, avós e avoas a comprender mellor os riscos e vantaxes do mundo dixital. “A Rede ofrece grandes oportunidades, pero é fundamental que tanto nenos como adultos coñezan os seus perigos para evitar situacións de risco”, engadiu.