Aberta a consulta a operadores para despregar fibra na zona vella de Santiago
martes, 12 de novembro do 2019
A
Axencia para a Modernización Tecnolóxica de Galicia (AMTEGA)
publicou este 12 de novembro unha resolución conxunta co Concello de
Santiago para que os operadores de telecomunicacións poidan
presentar proxectos de despregue de fibra óptica no casco histórico
de Compostela, en base ao Catálogo de Solucións Técnicas aprobado
este verán polo Goberno galego. Segundo
engade a axencia, até o 22 de novembro os operadores poden facer
chegar o seu interese en participar na consulta a través dun
formulario tipo recollido na resolución, que poden remitir a
través da páxina web da axencia
(https://amtega.xunta.gal/consultafo)
ou a través do correo consultafo@xunta.gal.
AMTEGA
explica que logo deste procedemento, abrirase unha primeira rolda de
xuntanzas cos operadores interesados ata o 16 de decembro. A
resolución contempla un prazo de dous meses hábiles desde a súa
publicación para a presentación dos plans de fornecemento
tecnolóxico. Os proxectos que presenten os operadores deberán
detallar o modelo de despregue e de financiamento.
Catálogo
de Solucións
Os
operadores formularán os posíbeis plans baseándose nas
alternativas que ofrece o Catálogo de solucións para actuacións de
tendido da rede de fibra óptica en contornas urbanas de especial
protección e conxuntos históricos de Galicia, elaborado pola
AMTEGA, RETEGAL e a Dirección Xeral do Patrimonio Cultural.
Como
lembra a axencia que dirixe Mar Pereira, a elaboración desta guía
partiuse do caso concreto de Santiago de Compostela e en colaboración
co Concello, co Consorcio de Santiago e cun equipo multidisciplinar,
elaboráronse unha serie de propostas viábeis e con marxe para
seren adoptadas a outros conxuntos históricos. Entre as solucións
que ofrece a guía están o trazado por cornixa, o soterramento ou o
despregue da fibra óptica a través das redes de saneamento. Segundo
lembra AMTEGA, a iniciativa ten un marcado cariz pioneiro, xa que a
publicación do catálogo e coa apertura da consulta aos operadores,
“Galicia está a abordar unha problemática presente en toda a
Unión Europea para a que ata agora non se ofrecera ningunha
solución”.