Ábrese a reserva dos novos auriculares con cable para Xbox
xoves, 19 de agosto do 2021
Os
auriculares sen fíos para Xbox de Microsoft convertéronse nun grande éxito
ao chegar como unha solución moi axeitada para os que combinan os xogos de
consola con outras fontes de son por Bluetooth (por exemplo, para atender a
chamadas telefónicas ou conversas a través de Discord), pero para quen
simplemente quere uns bos auriculares para a Xbox chegarán o 21 de setembro os auriculares
estéreo de Xbox a un prezo de 59,99 euros.
Estes novos auriculares con cable poden conectarse ao ordenador, a dispositivos
móbiles ou ao mando da Xbox, ofrecen compatibilidade coas tecnoloxías de audio
espacial (Windows Sonic, Dolby Atmos e DTS Headphone:X) e integran un micrófono
axustable que pode encartarse cando non se usa.
Temos aquí unha magnífica solución para quen desexe gozar de xogos con son
envolvente e conversar con outros xogadores con nitidez, sen ter que preocuparse
de baterías e conexións sen fíos (e a súa latencia), e a un prezo máis
accesible que os dos seus equivalentes sen fíos. Tamén é un bo argumento de
compra a súa alta compatibilidade, xa que ao conectarse mediante cable funciona
con numerosos equipos informáticos e consolas de videoxogos.
- Os novos auriculares teñen un deseño elegante e sinxelo, e ofrecen unha boa calidade sonora a un prezo axustado.