Activa Industria 4.0 impulsará a transformación de 30 PEME galegas
venres, 16 de agosto do 2019
A
Industria 4.0, é dicir, a transformación do noso modelo produtivo
cara a modelos intelixentes, sustentábeis, eficientes, competitivos
e automatizados, vén de recibir na nosa terra un novo impulso a dúas
bandas: autonómica e estatal. Estamos
a falar do programa Activa Industria 4.0, que apoiará a evolución
dixital da actividade de 30 PEME galegas. Contarán, para este
despegue cara ao futuro, co apoio da Consellería de Economía (a
través do IGAPE) e da Fundación Escola da Organización Industrial
(EOI), dependente do Ministerio e Industria. O programa Activa
insírese no proxecto Industria Conectada 4.0.
A
convocatoria, co-financiada polo IGAPE e a Fundación EOI cun total
de 208.050 euros, será de concorrencia competitiva e o prazo para
presentar as solicitudes ficará aberto até o vindeiro 16 de
setembro.
Segundo
informou o IGAPE, as empresas que resulten beneficiarias desta liña
de axudas recibirán “asesoramento especializado e individualizado
que incluirá un diagnóstico da situación de partida da compañía
e a elaboración dun plan de transformación dixital, así como
visitas ás instalacións beneficiarias e a participación en
obradoiros temáticos e demostrativos”.
O
programa do que estamos a falar é a segunda edición de Activa
Industria 4.0, unha iniciativa que na pasada convocatoria apoiou unha
ducia de firmas da nosa terra. O IGAPE engade que esta liña
complementa as accións do programa HADA, unha ferramenta de análise
e diagnose para coñecer o grao de madurez dixital das empresas, que
serve para orientar as actuacións vindeiras.