Activision Blizzard King intégrase en Xbox

Tras preto dun par de anos ata conseguir as aprobacións dos distintos organismos reguladores internacionais, Microsoft por fin anuncia a integración da compañía de videoxogos Activision Blizzard King nos equipos de Xbox, conseguindo así incorporar ao seu catálogo de xogos importantes franquías como Call of Duty, World of Warcraft, Overwatch ou mesmo Candy Crush Saga.
Con esta operación Xbox consegue mellorar a súa posición no mercado, medrando en marcas e estudios, para así poder xogar un rol máis activo nunha industria que está a evolucionar de cara ao xogo na nube (ámbito no que poden ter destacar grazas a que Microsoft é un dos principais provedores mundiais de infraestruturas de computación na nube).
O feito de que King forme parte de Activision Blizzard tamén é moi importante, xa que é un importante estudio de xogos para móbiles, mercado que move moitos cartos, e no que Microsoft apenas está presente.
Dende Xbox comprométense a levar os seus xogos cada vez a máis lugares, ou sexa, que moitos títulos que normalmente estaban asociados ao PC ou a unha consola en concreto, pasarán a poder gozarse en móbiles ou en streaming, o que supón máis posibilidades para os xogadores.
Para poder facer posible esta adquisición Microsoft tivo que adquirir unha serie de compromisos que fan que os xogos de Activision Blizzard vaian estar presentes en consolas de Sony e Nintendo durante os vindeiros 10 anos, así como tamén en Europa será posible unha opción sen precedentes: os xogadores que mercasen en dixital para PC ou consola un xogo de Activision Blizzard, poderán gozar dos mesmos a través de calquera servizo de xogo na nube (o que é un grande avance, xa que os xogos de Activision Blizzard non estaban dispoñibles en streaming).
Outro detalle bastante comentado sobre a compra de Activision Blizzard é que o seu máximo responsable, o polémico Bobby Kotick, manterase no seu cargo ata o remate do presente ano, entendéndose que para o ano que vén xa non formará parte da compañía.