Activistas TIC da nosa terra xuntan forzas en Lobeira a prol dos refuxiados
xoves, 9 de xuño do 2016
Os hackers e os
profesionais independentes das TIC tamén poden axudar, e moito, aos
refuxiados de calquera índole e condición. Con este alicerce
celebrouse estes días na nosa terra, no espazo alternativo de
coworking Sende (Lobeira, Ourense), o primeiro Hackathon
For Refugees, organizado por Sende en colaboración con Impact
Hub Vigo e Espazo Arroelo. O obxectivo: achegar ideas de impacto e
convertelas en realidades para dar resposta ás necesidades dos
refuxiados e das organizacións que os axudan. O encontro
desenvolveuse en dúas xeiras de traballo. A primeira xornada foi
unha toma de contacto para que os participantes se coñecesen e
puxeran en común as súas expectativas sobre os resultados do
Hackaton.
Na
primeira xeira seleccionáronse tres ideas para transformalas en
proxectos. Logo, na
segunda xornada, déronselles a estes proxectos forma e alicerces
firmes. Trátase, en detalle, dunha iniciativa para conectar a persoas refuxiadas con
voluntarios a través dunha plataforma tipo chat (Game
for change), un desenvolvemento tecnolóxico con
xeolocalización para facer seguimento de buques con persoas
desprazadas mediante dispositivos móbiles (Refu.gal,
que inclúe sitio web con bases
de datos e GPS) e unha iniciativa, Red
Alert Refugees, para
axudar a esta rede galega de voluntarios no artellado de datos e na
elaboración dun protocolo de coordinación de traballos, “co fin
de que as boas prácticas poidan ser replicábeis en distintas
localidades”. Esta última iniciativa implica a posta en marcha
dunha campaña de recadación colectiva de apoios nas redes
(crowdfunding).
Na
cita participaron arredor de quince emprendedores a activistas. A
iniciativa sumouse ao movemento Techfugees,
que tivo réplicas en Berlín, Nova York, Helsinqui, Turín, París,
Londres, Sydney ou Tel Aviv.
Segundo fan saber dende
Sende, “ademais dos resultados presentados como proxectos, o
#hackathon serviu tanto de punto de encontro para debater e
intercambiar información e experiencias sobre os problemas que
afectan as persoas refuxiadas, como para constituír un grupo de
traballo para continuar na procura destas solucións".