Adamo levará fibra óptica a 33.000 familias rurais de Lugo entre 2023 e 2024
xoves, 1 de decembro do 2022
Adamo
presentou os detalles da súa folla de ruta 2023-2024 para a
provincia de Lugo en materia de conectividade e Internet
ultrarrápida. Segundo fixo saber a operadora, preto de 33.000
familias que residen en zonas illadas e dispersas da provincia terán,
por fin, acceso a Internet de alta velocidade. Trátase de veciños
que agora contan cun sinal de baixo rendemento ou que, directamente,
carecen de conexión, segundo explica a empresa de telecomunicacións,
engadindo que estes números e estas previsións foron confirmados
esta semana polo Goberno, ao ratificar o resultado provisional da
segunda convocatoria do Programa ÚNICO - Banda larga, financiado por
Next Generation EU e dentro do Plan de Recuperación, Transformación
e Resiliencia.
A
operadora Adamo, principal adxudicatario a escala nacional das
subvencións comunitarias para estender fibra en áreas rurais
(312.000 vivendas en 17 provincias), será a empresa que levará a
cabo o cableado na provincia (do resto de Galicia encargaranse Avatel
en Ourense e Pontevedra- e Rede Aberta na Coruña). Para iso, Adamo
recibirá 12,3 millóns de euros, cantidade que completará con
outros 5,2 millóns de capital privado ata alcanzar os 17,5 de
orzamento total. O prazo para executar os traballos inclúe os anos
2023 e 2024.
Adamo
explica que os traballos a realizar “marcarán un antes e un
despois na vida desas 33.000 familias lucenses”, posto que “pasarán
a realizar con garantías, cunha conexión a Internet de calidade,
actividades que hoxe resultan en grao sumo habitual”. Por exemplo
teletraballo, educación online, compras por Internet, citas
médicas telemáticas ou gozar de videoxogos, series e películas en
remoto, entre outras. “Iso”, engade a compañía, “sitúa á
fibra óptica como un elemento fundamental para fixar habitantes no
territorio, como unha ferramenta imprescindíbel na loita contra o
fenómeno do despoboamento, un mal que afecta a numerosos pobos
lucenses”.