Adamo ofrece servizos gratuítos de SMS e chamadas entre España e Venezuela

A operadora de telecomunicacións Adamo, con forte presenza no rural de Lugo, emitiu un comunicado no que lamenta as vítimas ocasionadas polos terremotos que vén de sufrir Venezuela. Ao mesmo tempo, a empresa anunciou que tentará facilitar as comunicacións entre familiares e amigos, “tan necesitados nestes días de noticias e apoio”, sinalou a empresa.
Para iso, ofrece servizos de chamadas e SMS gratuítos para todas as comunicacións que se establezan desde liñas deste operador entre ambos os países, España e Venezuela. A esta activación únese o servizo de itinerancia en Venezuela, tanto para voz como para datos, tamén sen custo.
Adamo manda o seu “máis sentido pésame ás familias dos falecidos” e todo o ánimo a cada unha das persoas que sufrisen danos de calquera tipo -persoais ou materiais-, aos voluntarios e equipos de salvamento que traballan duramente nestes días, e a todo o pobo de Venezuela, impactado por esta catástrofe natural.