Adxudicadas dez bolsas formación para a investigación do Centro Ramón Piñeiro

Este venres 11 de novembro publicouse Diario Oficial de Galicia a resolución de adxudicación de 10 bolsas de formación no Centro Ramón Piñeiro para a Investigación en Humanidades (Secretaría Xeral de Política Lingüística) unhas axudas formativas nas que o Goberno galego inviste 237.600€ e coas que busca cada ano “fomentar a formación e capacitación das persoas con titulación universitaria, promovendo ao mesmo tempo o ensino, a cultura e a investigación en lingua galega”. Ao mesmo tempo, búscase tirar o máximo proveito das tecnoloxías da información para aumentar o coñecemento, a innovación, a visualización e os estudos arredor do galego.
En concreto, os proxectos nos que participarán as persoas adxudicatarias das bolsas son Bibliografía da Literatura galega, Fraseoloxía galega, Corpus de referencia do galego actual (CORGA), Cantigas de santa María, Terminoloxía científico-técnica, Recursos para o desenvolvemento de tecnoloxías da fala, Base de datos do ALIR e Dicionarios de Literatura. A data estimada de comezo da formación será o 1 de decembro de 2022 e rematará o 30 de novembro de 2024.
O Centro Ramón Piñeiro é unha institución de referencia en estudos de fundamentación e investigación filolóxicos, literarios e antropolóxicos. Dende o seu seo estase a potenciar o prestixio crecente da lingua galega entre as linguas románicas, fomentando liñas estruturais que favorecen os traballos de investigación nos eidos sinalados, baixo esquemas baseados na dixitalización das Humanidades.
Dixitalización do coñecemento
A maiores a súa orientación de traballo céntrase, ademais, na dixitalización do coñecemento. Desta forma búscase facilitar o acceso en liña dos resultados acadados nas súas investigacións, co propósito de ofrecer recursos dixitais e ferramentas que permitan a súa compartición e reutilización. O obxectivo final é “contribuír ao acceso igualitario do coñecemento de xeito que redunde nun beneficio común a prol do interese público”.