Afundación achéganos en Ferrol ás vantaxes e riscos das TIC na adolescencia
martes, 9 de xaneiro do 2018
ABANCA,
a través de Afundación, vai organizar en Ferrol unha interesante
charla que bota luz sobre os riscos que pode ter un uso irracional e
trabucado das ferramentas dixitais entre crianzas e adolescentes. A
cita (que chega a Ferrol despois
dunha edición previa en Lugo) será o 18 da xaneiro na sede
local de Afundación. O coloquio Os
menores ante as novas tecnoloxías: beneficios e riscos vén
da man do experto en seguridade tecnolóxica José Torres e
organízase ao abeiro do ciclo Educación e docencia no s. XXI.
José
Torres, para quen non o saiba, é responsábel do Equipo de
Investigación Tecnolóxica da Unidade Orgánica de Policía Xudicial
da Comandancia da Garda Civil de Pontevedra. Na sesión prevista en
Ferrol abordará as respostas que debe afrontar o eido da docencia
ante os novos retos que se lle propoñen ao alumnado do noso tempo.
Retos como por exemplo a necesidade de adaptarse á globalización e
ao uso masivo de Internet e as novas tecnoloxías, pero facéndoo dun
xeito racional, útil e enriquecedor. Segundo avanza Torres, os
múltiples beneficios da sociedade dixital están a verse embazados
por un incremento importante de delitos relacionados coas TIC,
derivados dun mal emprego destas ferramentas. O experto tamén
adianta que “lonxe de criminalizar as novas canles, é importante
que sexamos conscientes dos riscos e perigos que implica,
especialmente cando se trata dun colectivo tan vulnerábel coma o dos
menores”.