Agasallan un mando e un Chromecast Ultra coa compra de Cyberpunk 2077 para Stadia

A plataforma de xogos na nube de Google, Stadia, avanza a un ritmo bastante pausado, pero o vindeiro día 10 de decembro estreará un título que pode supor un antes e un despois, Cyberpunk 2077, xa que é un xogo moi esixente graficamente, o que pode animar a moitos xogadores a probar Stadia para poder gozalo cun elevado nivel de detalle sen ter que mercar un ordenador novo ou dar o salto ás consolas de nova xeración (nun momento no que nin están maduras nin teñen unha boa dispoñibilidade nas tendas).
Conscientes do potencial desta situación veñen de anunciar que os que merquen Cyberpunk 2077 en Stadia (xogo cun prezo de 59,99 euros) antes do 18 de decembro recibirán sen custo adicional a Premiere Edition de Stadia, un lote que por 99,99 euros (aínda que até o día 30 pode adquirirse de oferta po 69,99 euros, o que segue a ser máis caro que Cyberpunk 2077) inclúe un Chromecast Ultra e un mando de Stadia, ou sexa, todo o necesario para poder gozar de Stadia directamente no televisor (se contamos con acceso á Rede a través de Wi-Fi, loxicamente).
Esta promoción non se aplicará de xeito instantáneo, de xeito que os usuarios que reserven agora o xogo de CD Projekt Red recibirán un código durante a semana de lanzamento do xogo que servirá para adquirir de balde a Premiere Edition de Stadia.