Agosto será un grande mes para os Xbox con Gold

Tras un mes de xullo no que os Xogos con Gold máis destacables que recibían os subscritores de pagamento de Xbox LIVE eran os de Xbox 360, teremos un agosto máis que notable, no que todos os xogos son títulos de primeira fila, presentando unha das mellores seleccións de xogos deste programa, ao agrupar títulos importantes e, moi especialmente, de xéneros o suficientemente distintos como para que cada tipo de xogador atope algún do seu gusto.

Para Xbox One teremos a partires do 1 de agosto o xogo Forza Horizon 2 na súa edición estándar de 10º aniversario, ou sexa, a versión completa do xogo de condución, a aplicación de Forza Hub para Xbox One e o paquete de coches do décimo aniversario (como o Ferrari 458 Italia, o Lamborghini Huracán 2015 e o McLaren P1 2013). Aínda que este título teña 3 anos continúa a ser un excelente xogo de condución cun grande nivel gráfico.

A partires do 16 de agosto o xogo de Xbox One que recibirán os subscritores de pagamento será For Honor na súa edición estándar, o que supón unha magnífica oportunidade para gozar deste xogo de combates de grande realismo que causou furor o ano pasado coa súa proposta de enfrontar guerreiros de estilos moi diferentes e característicos (cabaleiros, viquingos e samurais).

Pero os xogos de Xbox 360 retrocompatibles con Xbox One tampouco quedan atrás, comezando por Dead Space 3, entrega que pechou esta triloxía de supervivencia espacial con toques de terror, que desta volta inclúe modo cooperativo en liña (para poder superar a súa historia en compañía dun amigo); e continuando con Disney Epic Mickey: El retorno de dos héroes, secuela de Epic Mickey que incorpora ao coello da sorte Oswald a xeito de compañeiro de Mickey, abrindo tamén esta aventura a un modo cooperativo para 2 xogadores.