Alberto Gago, novo director da Axencia Española de Supervisión de Intelixencia Artificial

A proposta da secretaria de Estado de Dixitalización e Intelixencia artificial, María González Veracruz, o Consello Reitor da Axencia Española de Supervisión de Intelixencia artificial (AESIA) acordou o nomeamento de Alberto Gago Fernández como novo director xeral do organismo público encargado de garantir o uso ético e seguro da intelixencia artificial en España, con sede na Coruña.
O nomeamento de Gago ten como obxectivo “abordar unha nova etapa na AESIA, para afianzala como ferramenta para achegar seguridade e confianza á cidadanía no uso da intelixencia artificial e fomentar o uso responsable desta tecnoloxía”.
Dende fontes estatais sinalan que a pertinencia da elección de Gago responde ao seu profundo coñecemento da Secretaría de Estado de Dixitalización e Intelixencia artificial desde a súa creación en 2020, onde nesta última etapa dirixiu a Oficina España Dixital 2030 e Internacionalización. Nesta unidade impulsou destacadas iniciativas como a Estratexia Nacional de Tecnoloxías Cuánticas ou o Sandbox de IA, así como a creación do AI Governance for Humanity Lab de Nacións Unidas en Valencia e a apertura da Comunidade de IA de Código Aberto. A combinación de experiencia práctica, diplomática e regulamentaria ao longo da súa traxectoria “sitúao nunha posición idónea para transformar a AESIA nunha ferramenta de apoio á cidadanía nesta nova etapa, ademais de proxectala como un referente internacional en supervisión e gobernanza da IA”, segundo explicou a Secretaría de Estado, engadindo que o novo director xeneral tomará a substitución a Ignasi Belda, artífice da posta en marcha da AESIA, institución pioneira en Europa, desde xuño de 2024.
Nesta etapa inicial, ademais de facerse cargo da instalación do organismo na súa sede da Coruña (cuxo persoal alcanzará os 55 empregados no próximo trimestre), “participou no deseño de políticas europeas de IA onde España, coa axencia, ostenta un papel moi proactivo nunha vintena de grupos de traballo da UE”, engadiron dende a Secretaría, salientando que a AESIA colaborou neste período na creación do primeiro Sandbox de IA, impulsado desde a Secretaría de Estado. Destaca, así mesmo, baixo a dirección de Belda, a posta en marcha da canle cidadá, que recibiu máis de medio milleiro de consultas para o bo uso de intelixencia artificial.
Alberto Gago
Alberto Gago conta cunha formación multidisciplinar en Tradución, Dereito Europeo, Protección de Datos e Relacións Internacionais, complementada con dominio de inglés e francés. A súa traxectoria profesional comezou na Comisión Europea, onde traballou durante oito anos no deseño de políticas sanitarias —incluída a creación da EU Health Policy Platform— e na elaboración do marco europeo de datos, participando na redacción da Directiva de Datos Abertos, o Regulamento de Gobernanza de Datos e o Regulamento de Datos. Así mesmo, xestionou o Grupo de Expertos sobre uso de datos para o interese público, consolidando unha experiencia técnica e regulamentaria na gobernanza do dato.
Máis tarde, durante catro anos foi asesor da Secretaría de Estado de Dixitalización e Intelixencia Artificial, onde desempeñou un papel central na creación de Gaia-X España, o deseño e posta en marcha do Sandbox regulamentario de IA e o proceso de constitución da AESIA. Participou activamente nas negociacións do Regulamento de IA durante a presidencia española do Consello da UE.
Na súa etapa máis recente, como director da Oficina España Dixital 2030 e Internacionalización, foi clave no impulso e execución da Estratexia Nacional de Tecnoloxías Cuánticas, a creación do AI Governance for Humanity Lab das Nacións Unidas en Valencia e na representación internacional de España nos principais foros globais —Nacións Unidas, OCDE, G20 e Consello de Europa—, ademais de promover iniciativas de cooperación con América Latina a través da SEGIB e a Alianza Dixital UE–LAC.