Alcatel presenta no CES os seus novos móbiles con Android

TCL Communication aproveitou a celebración do CES de Las Vegas para presentar a nova xeración de smartphones de Alcatel para o ano 2013, entre os que destaca o delgado Alcatel ONE TOUCH Idol Ultra, que presume de ser o smartphone máis delgado do mundo por ter un grosor de só 6,45 milímetros (superando a marca anterior fixada polo Vivo X1 con 6,55 milímetros de grosor). Este elegante móbil ten unha grande pantalla AMOLED de 4,7 polgadas cunha resolución de 1.280 x 720 píxeles, procesador de dobre núcleo a 1,2 GHz, cámara de 8 Mpíxeles (con gravación de vídeo a 1.080p) e sistema operativo Android 4.1.
Na mesma liña tamén chegará o Alcatel ONE TOUCH Idol, que desta volta en vez de apostar polo grosor optaría pola lixeireza (só pesa 110 gramos), mantendo unha pantalla de 4,7 polgadas (que neste caso é IPS), procesador de dobre núcleo e cámaras de 8 e 2 Mpíxeles. Tamén funciona con Android 4,1 e terá un acabado metálico para dotalo de maior elegancia.
Para completar a familia tamén teremos o Alcatel ONE TOUCH Scribe HD, que podería verse como a entrada da compañía nos tabletófonos, cunha pantalla HD de 5 polgadas, procesador MediaTeck MT6589 de catro núcleos, LTE, cámara traseira de 8 Mpíxeles e frontal a 720p e Android 4.1.

Móbiles asumibles baixo a marca ONE TOUCH Pop

Noutra gama de dispositivos, Alcatel tamén vai achegar ao mercado uns terminais máis asumibles que chegan en cores rechamantes e en 3 modelos distintos: Alcatel ONE TOUCH X’Pop, S’Pop e T’Pop. O X’Pop tería unha pantalla de 4,5 polgadas cunha resolución de 960 x 540 píxeles, procesador de dobre núcleo, 512 Gb de RAM, cámaras de 5 e 0,3 Mpíxeles, lector de tarxetas microSD e Android 4.1; o S’Pop sería un discreto terminal con pantalla de 3,5 polgadas cunha resolución de 480 x 320 píxeles, procesador mononucleo a 1 GHz, 512 Mb de RAM, cámaras de 3,2 e 0,3 Mpíxeles, lector de tarxetas microSD e Android 4.1; e o T’Pop tamén chegará cunha pantalla de 3,5 polgadas cunha resolución de 480 x 320 píxeles e procesador a 1 GHz, pero ao contar con só 256 Mb de RAM funciona con Android 2.3. Estes últimos terminais chegarán ao mercado durante este mesmo mes, e é de agardar que teñan uns prezos bastante contidos.