Alex Kidd incorpórase de balde ao cadro de personaxes de Sonic & All-Stars Racing Transformed

Hai unhas semanas saíu á venda o xogo Sonic & All-Stars Racing Transformed, título de carreiras que permite xogar tanto en local como en liña empregando uns 20 personaxes de videoxogos de SEGA como pilotos de vehículos acordes coa súa personalidade (entre os que figura como convidado o protagonista da película Rompe Ralph) e que está dispoñible para Xbox 360, PlayStation 3, PS Vita, Nintendo 3DS, Wii U e PC, sorprendeu na xornada de onte agasallando aos seus usuarios co desbloqueo (sen precisar de ningunha descarga de contido) dun novo personaxe, que non é outro que o lendario Alex Kidd, personaxe que contou con 6 xogos de seu para consolas de SEGA entre 1986 e 1990 e que xa apareceu como convidado en títulos como SEGA Superstars Tennis e o anterior Sonic & SEGA All-Stars Racing.
Alex Kidd estaba considerado como a mascota de SEGA durante a segunda metade dos anos 80, e SEGA decidiu gardalo no seu xogo de carreiras como agasallo de Nadal, o que agradecerán os nostálxicos que gozaran das aventuras deste personaxe no seu día. Queda agora por ver se estes últimos cameos de Alex Kidd conseguen recuperar a súa imaxe ata o nivel de animar ao seu retorno en novos xogos que sexan algo máis que adaptacións dos seus clásicos para a Consola Virtual da Wii.