Alg-a converte o MARCO nunha industria democrática de tecnoloxías
venres, 26 de maio do 2017
O
museo MARCO (Museo de Arte Contemporánea) de Vigo vai acoller os
vindeiros días unha actividade de espírito maker para
argallar e fabricar tecnoloxías e trebellos até hai pouco tempo
reservados aos procesos industriais xeralmente ligados ás grandes
empresas. O Obradoiro
de Fabricación Dixital celébrase os días 9 e 10 de xuño e vén da
man colectivo Alg-a Lab, laboratorio de experimentación cultural
posto en marcha en 2008 pola comunidade de artistas Alg-a (2003).
Segundo avanzan, a fabricación dixital é unha revolución en si
mesma, un xeito de democratizar ao máximo a construción de todo
tipo de pezas e compoñentes.
Asemade,
sinala Alg-a, “este ámbito de traballo brinda a oportunidade dun
entorno aberto de prototipado, cuestiona a eficiencia e finalidade do
que nos rodea, e, ademais, tende cara a unha implementación
intelixente, unha implementación smart, dos obxectos na
chamada Internet das Cousas”.
A
actividade, achegada co cancelo #SalóndoMARCO, desenvolverase en
dúas xeiras de traballo. Na primeira, a do venres 9 de xuño, o
horario será de 19.00 a 21.00. Segundo explican os organizadores,
habilitarase “un espazo práctico onde se amosarán máquinas e
diferentes pezas e posibilidades de impresión, amais de facer
fincapé na problemática da democratización das tecnoloxías de
fabricación”.
O
sábado 10 de xuño, en horario de 10.00 a 13.00, abordarase de que
xeito a fabricación dixital e as novas tecnoloxías atinxen ao
proceso e resultados creativos de artistas, deseñadores, arquitectos
ou fotógrafos. Isto farase, segundo Alg-a, “dende a base da
mistura de disciplinas creativas co fío condutor da tecnoloxía;
dende a súa perspectiva persoal e profesional”. Ao mesmo tempo
habilitarase unha oficina de asesoría para proxectos de impresión
en 3D.
Os
mediadores deste Obradoiro de Fabricación Dixital son: Marco Durán
(emprendedor social, programador de software e membro da Makerversity
Londres, amais de residente en Alg-a Lab e socio fundador da FabSpace
Cooperativa) e Marta Verde (artista visual e programadora creativa
afincada en Madrid, amais de licenciada en Belas Artes e
especializada en Media Arts e Tecnoloxías Dixitais para a Escena).