Altia cotizará no Mercado Alternativo Bolsista

A galega Altia Consultores, compañía especializada en solucións informáticas e de comunicación, recibiu a aprobación de Bolsas e Mercado para a súa incorporación ao Mercado Alternativo Bolsista (MAB) posiblemente o vindeiro 1 de decembro, para o que a compañía de consultoría conta coa colaboración de DCM Asesores coma asesor rexistrado e Bankinter coma banco colaborador.
A colocación farase entre investidores institucionais de España e outros países da Unión Europea que deberán facer un desembolso mínimo de 50.000 euros, realizándose esta operación a través dunha ampliación de capital (OPS).
Actualmente a compañía galega ten un capital social de 118.000 euros, e coa súa apertura ao MAB pretende «acometer proxectos de grande envergadura e realizar algunha operación corporativa no mercado español» deixando a porta aberta ao financiamento de potenciais desenvolvementos «distintos aos sinalados no folleto de incorporación» ao tempo que dará valor ás accións que poidan servir de cara a futuros movementos corporativos.
Altia Consultores sería a décima empresa en integrarse no Mercado Alternativo, con compañías tan relevantes coma Zinkia, Imaginarium ou Nostrum, e colocará o 15% da empresa no mercado a un prezo por acción que irá entre os 17,5 e os 20,5 euros (o prezo fixarase o vindeiro luns), conservando o presidente de Altia, Constantino Fernández, o 85% da compañía.