Alumnado da UVigo combaterá con vídeos divulgativos as informacións falsas na Rede
luns, 6 de abril do 2020
- O profesor Alberto Dafonte está á fronte do proxecto
As
informacións falsas en Internet son case tan negativas e
prexudiciais para a loita contra o COVID-19 coma a existencia do
propio coronavirus. Partindo desta premisa e asumindo un horizonte
temático máis xenérico có da crise sanitaria que estamos a vivir,
aínda que esta actúe de marco temático actual, alumnas
e alumnos de Publicidade e Relacións Públicas do Campus de
Pontevedra (Universidade de Vigo), en colaboración con A Redeira,
puxeron en marcha unha iniciativa para combater con vídeos
divulgativos as informacións falsas que proliferan polas redes.
O que de xeito común se coñecen como fake news.
O
obxectivo da proposta vai alén de mitigar os efectos desta
información en negativo: o que se busca, tamén, é mellorar a
competencia mediática da cidadanía, adestrando a poboación para
saber, coloquialmente falando, diferenciar o gran da palla.
Esta
é a base do proxecto que, ao longo deste cuadrimestre, o profesor da
Facultade de Ciencias Sociais e da Comunicación Alberto Dafonte
desenvolve virtualmente con máis de 60 alumnos e alumnas do grao en
Publicidade e Relacións Públicas, e que inclúe unha serie de pezas
audiovisuais nas que acheguen recomendacións e ferramentas “de
identificación e defensa ante as novas falsas”.
Seleccionada
na convocatoria de proxectos de aprendizaxe-servizo impulsada pola
Área de Formación e Innovación Educativa da Universidade,
participan nesta iniciativa, divididos en once grupos de traballo, 63
alumnos e alumnas da materia Teoría e práctica da comunicación
televisiva.
Respecto
da participación do banco de tempo A Redeira, actuará como
“intermediario” entre o alumnado e diferentes persoas e
colectivos.
Dixitais.
Laboratorio cidadán para a competencia dixital e mediática é o
título dun proxecto que, tras unha introdución ao “problema da
desinformación na contorna dixital e os seus efectos sobre distintos
colectivos”, arrincou en febreiro cun seminario impartido por catro
integrantes de A Redeira: Mariem Filgueira, Cristina Fariñas, Pablo
Larrubia e Sara Martínez. A elaboración das pílulas audiovisuais
informativas e divulgativas é un dos piares do proxecto. Serán,
segundo conta Dafonte, “pezas simples e breves, stories,
pensadas para WhatsApp ou TikTok”, completándoas con vídeos de
meirande extensión, ideados para outra serie de plataformas como
YouTube.
O
obxectivo do proxecto, sinala Dafonte, é que as e os estudantes
“pensen tanto no que van dicir como en que van facer para dirixirse
a un público concreto”, tendo en conta factores como o formato, a
plataforma idónea para distribuílo ou os “requisitos estéticos e
tendencias” das diferentes redes sociais.
A
colaboración da Redeira permitirá que os vídeos poidan orientarse
a “públicos dispares”, desde adolescentes á terceira idade, ou
reflexionar sobre a existencia na Rede “de mancheas de contidos
falsos orientados á criminalización dos inmigrantes, do colectivo
LGTBI ou o movemento feminista”.