Amazon permite converter as súas tabletas en pantallas con Alexa

A familia de tabletas de Amazon ten un par de novidades dende hoxe, que aínda que polo momento non están dispoñibles no mercado español, non sería descartable que o fixesen nos vindeiros meses. Un dos produtos que probablemente máis agradecerían os consumidores españois será a nova tableta Amazon Fire HD de 10,1 polgadas dentro da serie Kids Edition, que por 199,99 dólares/libras/euros ofrece non só unha tableta Full HD cunha carcasa protectora, senón que tamén conta cun seguro de 2 anos, de xeito que sería a tableta máis a proba de cativos do mercado.
Pero o produto máis rechamante é a nova base de carga para as tabletas Fire HD 10 e Fire HD 8 (esta última tableta, si á venda en España), que permite colocar as tabletas de Amazon nunha peaña, a xeito de marco dixital, o que transforma virtualmente a tableta nun Amazon Echo Show, de xeito que pode empregarse para reproducir música e vídeo, ver fotografías, realizar videoconferencias... e tamén empregar Alexa a viva voz, para así poder darlle ordes e, por exemplo, controlar dispositivos conectados no fogar, mercar produtos en Amazon ou realizar consultas ao asistente virtual de Amazon.
Temos así unha curiosa solución que permite que, quen xa teñan unha tableta, poida facerse cunha pantalla conectada con Alexa sen ter que facer un grande desenvolvemento económico, xa que estas bases de carga como Modo Show véndense a 34,99 e 49,99 dólares.