Amazon prepara a estrea dunha serie sobre o Camiño de Santiago

venres, 15 de xaneiro do 2021 Redacción

O 22 de xaneiro é a data prevista para a estrea dunha nova serie que a plataforma Amazon Prime vén de impulsar. Trátase de 3 Camiños, unha ficción que trata sobre a experiencia que supón facer o Camiño de Santiago. Presentouse hoxe, precisamente, na capital galega.
Estamos perante un proxecto de corte internacional pois a dita serie está producida por Amazon, Ficción Producións e Beta Films, asemade conta coa participación de Radio Televisión de Galicia, RTP de Portugal e Unoenlouno de México.
3 Camiños xunta a persoas de todo o mundo (e as súas culturas) a través dunha peregrinaxe que remata na Catedral de Santiago. A serie está dirixida por Iñaki Mercero, Franciska Meletzky e Norberto López Amado e consta de oito episodios que poderán verse en Amazon Prime Vídeo.
En canto a protagonistas, atoparemos aos españois Álex González (Roberto), Verónica Echegui (Raquel) e Alberto Jo Le (Yoon Soo) -cuxa familia é de orixe surcoreana-, a alemá Anna Schimrigk (Jana) e o italiano Andrea Bosca (Luca) -a quen se une a mexicana Cecilia Suárez (Úrsula) na segunda metade da tempada-, dá conta do carácter internacional do proxecto, no que se manexan até sete idiomas: español, inglés, coreano, alemán, italiano, francés e portugués.
O Camiño pasa a ser o eixo central no que se desenvolve a trama que xorde das 5 vidas dos diferentes personaxes que pertencen a 5 nacionalidades diferentes cun Camiño común que os une (o de Santiago). As súas vidas son contadas deténdose en tres ocasións nas que xuntos fan o Camiño nos anos 2000, 2006 e 2021.
Engadir que a serie 3 Camiños está patrocinada polo Xacobeo 2021, un xeito de dar a coñecer os pobos e cidades que percorren a ruta e un xeito tamén de alentar aos espectadores a facer o Camiño.

PUBLICIDADE