Amazon renova a marca do seu servizo de Internet por satélite que competirá con Starlink

Amazon anunciou que o seu ambicioso proxecto de acceso á Internet por satélite, coñecido ata agora como Project Kuiper, pasa a chamarse oficialmente Amazon Leo. O novo nome fai referencia directa á constelación de satélites en órbita baixa terrestre que sustenta a rede e marca o inicio dunha etapa máis madura para a iniciativa.
Segundo explicou Rajeev Badyal, vicepresidente de Amazon Leo, a compañía leva sete anos traballando para deseñar unha das redes de comunicacións máis avanzadas do mundo. O obxectivo é claro: levar conexión rápida e fiable a millóns de persoas e organizacións que hoxe carecen de acceso a Internet de alta velocidade. Para iso, Amazon xa ten en órbita máis de 150 satélites tras seis lanzamentos con éxito e prevé completar máis de 80 misións para despregar a súa constelación inicial.
O proxecto, que comezou cun pequeno equipo e uns poucos deseños sobre papel, foi bautizado inicialmente como Project Kuiper en homenaxe ao cinto de asteroides do sistema solar exterior. Durante estes anos, baixo ese nome, Amazon conseguiu licenzas, asinou contratos de lanzamento históricos e realizou misións de proba con éxito. Agora, coa marca definitiva, a compañía quere reforzar a súa identidade e avanzar cara á prestación de servizo comercial.
Amazon Leo conta cunha das maiores liñas de produción de satélites do planeta e desenvolveu terminais de cliente de última xeración, incluíndo a primeira antena comercial de matriz en fase capaz de soportar velocidades de ata 1 Gbps. Entre os seus futuros socios e clientes figuran compañías como JetBlue, L3Harris, DIRECTV Latin America, Sky Brasil e NBN Co., operador da rede nacional australiana.
A empresa prevé iniciar a prestación de servizo unha vez que a cobertura e capacidade da rede sexan dabondo, consolidando así a súa aposta por reducir a fenda dixital e ampliar o acceso global á conectividade.