Ames activa a segunda edición de Galetiktokers, que vén con 600 euros en premios

Este ano volve o certame Galetiktokers, impulsado polos departamentos de Mocidade e Normalización Lingüística do Concello de Ames co obxectivo de dinamizar a creación de vídeos en galegos “con novos formatos e temáticas”. Novamente o concurso porá o punto de mira na rede social TikTok, un punto de encontro referencial da comunidade galegofalante. A nova edición do Galetiktokers (a segunda) repartirá 600 euros en premios.
Foi dada a coñecer este 27 de outubro pola concelleira de Mocidade e Normalización Lingüística, Escarlata Pampín, xunto ás influencers e presentadoras Lucía Rodríguez e Fátima Pego. Segundo fixo saber a edil, búscase aproveitar o “talento da xente moza” para “espallar a nosa lingua”, con contidos audiovisuais adaptados a elas e eles. Nesta edición poderá participar rapazada a partir dos 13 anos de calquera parte do mundo, enviando o seu vídeo e esta ficha de participación ao enderezo electrónico galetiktokers21@gmail.com, ata o 19 de novembro. Repartiranse catro premios de 150 euros nunha gala que se celebrará o 16 de decembro, na Casa da Cultura de Bertamiráns.
Pampín tamén fixo sabes que nesta edición porase o foco na colaboración de “figuras importantes das redes sociais galegas”, que servirán para “aportar ese plus importante a este certame” e “axudar a espallar a información para que non deixe de participar ninguén”.
A concelleira e a organización buscan mellorar a participación con respecto ao pasado ano, ampliando ademais a participación a persoas de fóra do propio concello, iso si, “co foco na nosa lingua”. Seguindo este fío, a concelleira explicou que “hai unha chea de talento por todo o país de xente moza, e tratamos de aproveitalo e de espallar a lingua, e de que cada vez sexan máis os vídeos e os contidos audiovisuais e de creación en galego”. A presentadora e instagramer, Fátima Pego, animou a todo o mundo a participar e a valorar a importancia das comunidades na Rede: “Hai moitísimas creadoras e creadores que están desexando sacar iso que levan dentro, entón que se animen, que non pensen que o seu contido non é o suficientemente bo, xa que ten o seu valor e todo suma a favor da difusión da nosa lingua e de facer comunidade”. Pola súa banda, Lucía Rodríguez engadiu: “É unha estupenda ocasión para animalos a ser creativos, empregando a nosa música, o noso entorno ou a natureza, e así demostrar que somos galetiktokers e non só tiktokers normais”.
Categorías, premios e xurado
Segundo fixeron saber, no certame poden participar mozos e mozas a partir dos 13 anos, repartidos en dúas categorías en función da idade. A primeira categoría inclúe á rapazada dos 13 aos 16 anos (ambas as idades incluídas) e a segunda engloba a mocidade a partir dos 17 anos. Como novidade da presente edición, pode participar calquera persoa, sen ter que ser veciño ou veciña do concello.
O concurso reparte catro premios de 150 euros, dous por categoría de idade. Dous dos premios decidiraos o xurado que se nomee e os outros dous escolleraos o público, dado que serán para as pezas audiovisuais con máis gústame no perfil de Instagram da OMIX de Ames (@omixames).
Os vídeos creados para esta segunda edición do certame Galetiktokers teñen que estar en lingua galega, e deben ser de creación propia a través da aplicación TikTok, cunha duración de entre 15 e 60 segundos. Será obrigatorio que a lingua teña presenza, xa sexa de xeito oral, escrito ou musical. A concelleira explicou que “a temática é libre, polo que terán cabida no concurso pezas relacionadas coa música, co humor, co baile, coa interpretación, co deporte... ou con calquera outro tema”. Non se admitirán vídeos que promovan unha mensaxe violenta, denigrante ou ofensiva.
Inscrición e prazos
Para participar no certame, cómpre enviar ao enderezo electrónico galetiktokers21@gmail.com unha ficha participación cuberta e asinada (PDF), ademais do propio vídeo que se presenta no concurso. O prazo de inscrición rematará o 19 de novembro de 2021. A organización comprobará que se cumpren os requisitos e validará a inscrición a través dun correo de confirmación.
Todas as pezas admitidas subiranse ao perfil de Instagram da OMIX de Ames (@omixames), co cancelo #galetiktokers. O prazo de votación para determinar os premios do público será entre o 23 e o 30 de novembro ás 23:59 horas. Para poder votar será necesario seguir o perfil de Instagram da OMIX de Ames.